Threads áleumettík jelísí paıdalanushylarynyń belsendílígín taldau nátıjesí kórsetkendeı, dástúrlí bot-jelílermen qatar, akkaunttardyń úılestírílgen jelílerí de belsendílík tanytuda. Olar «svormıng» (swarming) dep atalatyn taktıkany qoldanady. Būl - qatysushylardyń shaǵyn tobynyń kelísílgen áreketterí arqyly audıtorıyada jappaı qoǵamdyq qoldau nemese, kerísínshe, keń auqymdy narazylyq turaly jalǵan áser qalyptastyru ádísí.
Aldyn ala belgílengen úlgí boıynsha bírsaryndy habarlamalar taratatyn klassıkalyq bot fermalaryna qaraǵanda, mūndaı jelíler áldeqaıda ıkemdí áreket etedí. Olar talqylaudyń barysyna jedel áreket etíp, jekelegen tezısterdí kúsheıtedí, sondaı-aq píkírtalasqa shynaıy paıdalanushylardy tartady. Osylaısha, belgílí bír kózqaras kópshílíktíń píkírí íspettí degen túsíníktí bírtíndep qalyptastyrady.
Jalǵan aqparatqa qarsy ís-qımyl ortalyǵy aqparattyq keńístíktí taldau barysynda respublıkalyq referendumdy daıyndau jáne ótkízu kezeńínde osyndaı belgílerdí anyqtady.
4 aqpan men 30 nauryz aralyǵynda 350-den astam akkaunt pen 5 786 jarıyalanym zertteldí. Taldau nátıjesínde, zerttelgen akkaunttardyń 71%-ynda ıelerí turaly naqty málímet kórsetílmegení anyqtaldy. Akkaunttardyń 52%-y belsendí aqparattyq nauqan bastalardan az uaqyt būryn tírkelgen. Al referendum ayaqtalǵannan keıín olardyń shamamen 60%-nyń belsendílígí kúrt tómendegen. Jarıyalanymdardyń bír bólígí keıínnen óshírílgen. Būl atalǵan akkaunttardyń negízínen naqty bír aqparattyq nauqan ayasynda paıdalanylǵanyn kórsetuí múmkín.
Zertteu mūndaı operatsıyalardyń tıptík stsenarııín aıqyndauǵa múmkíndík berdí.
Aldymen emotsıyalyq nemese dauly sıpattaǵy tezıs jarıyalanady. Keıín ol basqa akkaunttar tarapynan píkírler, reposttar jáne reaktsıyalar arqyly sınhrondy túrde qoldau tabady. Osydan keıín talqylauǵa qarapaıym paıdalanushylar qosylyp, bolyp jatqan protsestí tabıǵı qoǵamdyq píkírtalas retínde qabyldaıdy. Dál osy kezeńde jappaı qoldau áserí qalyptasady. Alaıda bastapqy aqparattyq serpín úılestírílgen qatysushylardyń salystyrmaly túrde shaǵyn tobynan shyǵuy múmkín.
Zerttelgen barlyq keısterde ūqsas belgíler tírkeldí. Atap aıtqanda, jarıyalanymdardyń sınhrondylyǵy, argumentterdíń qaıtalanuy, bírdeı narratıvterdíń jyldam taraluy jáne jekelegen habarlamalardy kelísílgen túrde kúsheıtu baıqaldy.
Keıíngí kezeńde Qazaqstan Respublıkasynyń syrtqy sayası qyzmetíne qatysty 114 akkauntta jarıyalanǵan 160 materıalǵa júrgízílgen qosymsha taldau mūndaı tetíkterdíń tūraqty sıpatqa ıe ekenín aıǵaqtady. Zertteu qorytyndysy boıynsha jarıyalanymdardyń 88,3%-y aqparattyq sebep paıda bolǵannan keıíngí alǵashqy táulíkte taralǵan. Audıtorıyanyń eń joǵary belsendílígí men qyzyǵushylyǵyn terís sıpattaǵy kontent tudyrǵan. Onyń úlesí habarlamalardyń jalpy kólemíníń 39%-yn qūrady. Zerttelgen akkaunttardyń shamamen 30%-y táulígíne 9-dan 12-ge deıín habarlama jarıyalap, aqparattyq aǵynnyń joǵary qarqynyn saqtap otyrǵan.
Zertteu mūndaı tetíkterdíń tek sayası kún tártíbínde ǵana qoldanylmaıtynyn kórsettí. Úılestírudíń ūqsas belgílerí áleumettík sayasat, densaulyq saqtau, memlekettík reformalar, tarıfter, áleumettík tólemder jáne qoǵamda joǵary emotsıyalyq reaktsıya tuǵyzatyn ózge de taqyryptardy talqylau kezínde de baıqalady.
Qazírgí aqparattyq operatsıyalardyń basty erekshelígí - olardyń maqsaty audıtorıyany faktíler arqyly sendíru emes, kópshílíktíń píkírí qalyptasyp qoıǵandaı ıllyuzıya jasau. Adam belgílí bír ūstanymdy, eger ony kópshílík qoldap otyr dep qabyldasa, áldeqaıda ońaı qabyldaıdy.
Áleumettík jelílerdegí jarıyalanymdardyń jappaı sıpat aluy árkez qoǵamnyń shynaıy kóńíl-kúıín bíldíre bermeıtíníne nazar audaramyz. Kóp jaǵdaıda būl jekelegen aqparattyq sebepterdí jasandy túrde kúsheıtetín shekteulí akkaunttar tobynyń kelísílgen áreketteríníń nátıjesí boluy múmkín.
Jalǵan aqparatqa qarsy ís-qımyl ortalyǵy tsıfrlyq ortada jasandy qoǵamdyq kún tártíbín qalyptastyrudyń zamanauı tetíkteríne zertteu júrgízdí
