Názíktígí men tabandylyǵyn bír arnaǵa toǵystyrǵan Aqtóbeníń tumasy Saltanat – qazaq zergerlík óneríníń búgíngí jas ókílí. Erlerge tán dep sanalyp kelgen būl kásípte boı kórsetíp, kúmís pen altynǵa jan bítíríp júrgen sheber qyzdyń qoltańbasy búgínde kópshílíktí tańdaı qaqtyrady. Zerlí áshekeıdíń ár syzyǵynda onyń sezímí, ár būıymynda órílgen ūlttyq naqysh bar. Bíz Qosai brendíníń ıesí Saltanatpen zergerlík ónerge kelu joly, shabytynyń bastauy jáne názík jannyń būl kásíptí ıgeruí turaly áńgímelestík.
Iá, bastapqyda kóbísí túsínbeı, «ol seníń qolyńnan kele me, zergerlíkten aınalysuǵa kóbíne qoldyń eptílígí men kúshí kerek, al sen qyz balasyń ǵoı» degen kezder de boldy. Qıyndyǵy men qyzyǵy qatar būl kásípke keluíme meníń osyndaı mūqıyat jasalatyn jūmystarǵa qyzyǵushylyǵym sebep boldy dep oılaımyn.
Shyǵarmashylyq baǵyttaǵy jūmystarǵa shabyt kerek bolatyny ras, bíraq men shabyt kútíp kóp oılanbaımyn, ol óz-ózínen keledí. Bír kezde jaı seruendep júrsem, keıde muzyka tyńdaǵanda shabyttanyp ketemín, bírde kózíme túsíp qalǵan bólshektíń ózí jańa ıdeya beredí. Al keıde ózímníń būrynǵy jūmystarymdy qarap shyǵyp ta shabyttanatyn uaqytym bolyp tūrady.
Men kóbíne kúmíspen jáne tabıǵı tastarmen jūmys ísteımín. Kúmís – jūmsaq, ıílgísh árí tarıhı dúnıelerge tán materıal, al tabıǵı tastar ár būıymǵa ózíníń energıyasy men «mínezín» beredí. Eń alǵashqy jasaǵan būıymym – bıryuza tasy ornatylǵan, qoshqar múıíz oyuymen órnektelgen kúmís alqa, sony jasap ūstazyma kórsetkenmín, ol kísí būl seníń alǵashqy jūmysyń ózíńde estelík bolyp qaluy kerek dedí.
Kez kelgen būıymdy jasau protsesí oıyńa túsken ıdeyadan bastalady ǵoı, eń aldymen oıymdy eskızge túsíremín, sosyn metaldy daıyndap, kesíp, písíríp, píshínín qalyptaımyn, sońynda óńdep, jyltyratamyn, jūmys barysynyń ár qadamy būıymdy bírtíndep «tíríltíp», qolǵa ūstap, kóben kóretín daıyn dúnıe paıda bolady. Eskızdí ózím qolmen salamyn nemese Procreate grafıkalyq redaktoryn qoldanamyn. Kóbíne jaı ǵana tynysh jerde otyryp, oıymdy qaǵazǵa túsírgen ūnaıdy. Meníń zergerlík qoltańbam jūmysty bastan-ayaq óz qolymmen jasaıtynymmen erekshelenedí, ár būıymda meníń energıyam bar, ár áshekeıdíń ózíne tıesílí jeke tarıhy da bar, sol sebeptí men úshín zergerlík būıym jansyz zat emes, tírí dúnıe sıyaqty.
Germanıyadan túsken tapsyrys
Áshekeı jasaǵanda kóbíne óz dızaındarym boıynsha tapsyrys alamyn, bíraq keıde klıentterdíń ıdeyasymen jeke tapsyrystar da jasalady. Árqashan eskızdí syzǵan kezden bastap olarmen habarlasyp, aqyldasyp otyramyn. Meníń stılím – etno men zamanauı trendtí úılestírgendíkten kóbíne klıentterdíń kóńílínen shyǵady.
Osy oraıda esímde qalǵan erekshe tapsyrys turaly aıta keteıín, Germanıyadan bír klıent bízdegí jebe alqasyna tapsyrys berdí. Sóıtsek, ol kísíníń balasynyń aty nemís tílínen audarǵanda «jebe» degen maǵyna beredí eken. Sol maǵynany saqtap, oǵan arnaıy jebe alqasyn jasap beru – maǵan erekshe áser qaldyrǵan tapsyrystardyń bírí boldy.
Osy kásíppen aınalysyp júrgen soń, árıne, zergerlík trendterdí de baqylap júremín, bíraq óz stılímdí tapqanda, kerísínshe óz jūmysym arqyly trend jasaǵym keledí. Men ūsynǵan ıdeyalar men formalar adamdarǵa ūnap, jańa baǵytqa yqpal etse eken degen nıetím bar.
Ūqyptylyq pen shydamdylyq - zergerdíń basty qasıetí
Ár salanyń mamandaryna ǵana belgílí íshkí qıyndyǵy bolatyny sıyaqty, būl saladaǵy qıyndyq – óte ūqyptylyqty, shydamdylyqty talap etetín, keıde fızıkalyq tūrǵydan auyr bolatyn, keıbír kúrdelí dızaıny kóp uaqyt alatyn jūmys. Ol qıyndyqtardy eńseru úshín ár qadamǵa mūqıyat kóńíl bólemín, shydamdylyq tanytamyn jáne jūmysyma súıíspenshílíkpen qaraımyn.
Zerger maman retínde osy kezge deıín kásíbı ortada ártúrlí tapsyrys berushímen jūmys ístep, olardyń talaptaryn túsíníp, óz stılímmen úılestíre bílu tájírıbesín jınadym. Sondaı-aq ártúrlí materıaldarmen, kúrdelí dızaındarmen jūmys jasau arqyly kásíbı sheberlígímdí shyńdadym. Būl tájírıbe maǵan óz brendímdí qalyptastyruǵa jáne shyǵarmashylyq sheshímder qabyldauǵa kómektesedí.
Bír būıymnyń eskızínen bastap tolyq daıyndaluyna deıín ortasha eseppen 3–7 kúndeı uaqyt ketedí, árıne, keıbír kúrdelí jūmystar kóbírek uaqyt alady. Osy uaqytqa deıín men úshín eń kúrdelí jūmys – otau júzík saqınasy boldy. Būl ūlttyq saqınalardyń bíregeıí, úshbūryshty pıramıda tárízdes etíp jasalady. Árbír pıramıdanyń bólshekterín dál bírdeı etíp jasap, qoldan jınau bastapqyda qıyn bolǵany ras. Bíraq tájírıbe jınap, qolym úıreníp alǵannan keıín būl qıyndyq ta jeńíldeı bastady.
Ár kásípkerdíń alǵa qoıǵan jospary bolady, men de aldaǵy uaqytta zergerlík salasynda kásíbı tūrǵydan ózímdí damytqym keledí. Jeke stılímdí tolyq qalyptastyryp, óz brendímdí damytyp, avtorlyq kollektsıyalar shyǵaru meníń basty maqsatym.
Brendíme ruymnyń atyn berdím
Meníń zergerlík brendímníń aty – Qosaı. Būl meníń ruymnyń aty, Qosaı batyrdyń qūrmetíne qoıylǵan jáne qazaq sózíndegí «qosu, bíríktíru» sıyaqty maǵynany beredí. Sol sebeptí būl atau brendtíń fılosofıyasyn, yaǵnı tarıh pen ónerdí, dástúr men zamanauı shyǵarmashylyqty bíríktírudí bíldíredí.
Ózím mamandyǵym boıynsha arheologıyalyq suretshímín. Zergerlík ónermen kásíbı túrde 2019 jyldan berí aınalysyp, sol uaqyttan berí tarıhı jádígerlerdí zergerlík būıymdarǵa aınaldyrumen kelemín.
Qazír Qosai brendí aqyryndap damyp keledí. Alda kóp jūmystar bar, eń bastysy – būl jaı ǵana zergerlík būıymdar satatyn oryn emes, maǵynaǵa ıe, salmaqty brend boluyn qalaımyn. Sol úshín ár būıymdy ózímníń stılímdí jáne fılosofıyamdy kórsetetíndeı etíp jasauǵa kúsh salamyn.
Meníń otbasymda zergerlíkke jaqyn nemese kásíbı aınalysatyn adam bolǵan emes. Ákemníń qol ūstalyǵy bar, kíshkentaı kezímde maǵan suret saluǵa arnalǵan molbert sıyaqty zattardy aǵashtan jasap beretín. Naǵashy jaǵymda da suretke jaqyn adamdar bar.
Kózín tapsań, zergerlík - tabysty bıznes
Ár kásíptíń tabysty boluy adamnyń qajetín óteı aluyna, basqalardan erekshelígínde dep edím, eger eńbekteníp, óz stılíńdí tauyp, klıentteríńdí qalyptastyra alsań, zergerlík kásíptí de tabysty bızneske aınaldyruǵa bolady, eń bastysy – sapa men jeke erekshelíktí saqtau.
Sóz sońynda zergerlíkke qyzyǵatyn, osy kásíppen aılanysqysy keletín jastar bolsa, esh qoryqpańyz jáne tezírek bastańyz der edím. Bastapqyda mínsíz būıym jasaımyn dep bosqa túńílíp ketudíń keregí joq, eń áuelí qolyńa qūral alyp, jasap kórgen mańyzdy. Shydamdylyq tanytyp, óz stılíńízdí tauyp, ár būıymǵa júregíńíz ben janyńyzdy salsańyz, bárí óz jolymen keledí.
