Venesuela bılígí "bírshama" tūtqyndy bosatqanyn málímdedí. Olardyń qatarynda oppozıtsıya ókílderí men shetel azamattary da bar, alaıda naqty tízím ázírge jarıyalanǵan joq, dep habarlaıdy Aqshamnews.kz tílshísí.
Ispanıya tarapy óz elíníń bes azamaty bostandyqqa shyqqanyn rastady. BAQ málímetínshe, túrmeden būrynǵy prezıdenttíkke kandıdat Enrıke Markes pen Marıya Korına Machadonyń jaqtasy Bıadjo Pılerı de bosatylǵan.
Úkímet málímdemesínde bosatylatyndar tízímíne rejımníń belgílí qarsylastary engízílgení aıtyldy. Olardyń íshínde sayasatker Huan Pablo Guanıpa men qūqyq qorǵaushy Rosıo San-Mıgel bar. Sondaı-aq bírqatar aqparat qūraldary oppozıtsıya men halyqaralyq baqylaushylardyń píkírínshe, Venesuelada ótken sońǵy prezıdent saılauynda ís júzínde jeńíske jetken Edmundo Gonsales Urrutııdíń kúıeu balasy Rafael Tudarestíń de bosatyluy múmkín ekenín jazdy.
AQSh ákímshílígíníń halyqaralyq íster jóníndegí baspasóz hatshysy Anna Kellı būl jaǵdaıǵa qatysty píkír bíldíríp, Venesuelada sayası tūtqyndardy bosatu «"prezıdenttíń yqpalyn barynsha paıdalanyp, amerıkalyq jáne venesuelalyq halyqqa qatysty dūrys qadam jasauyna mysal" ekenín aıtty.
Foro Penal qūqyq qorǵau ūıymynyń deregínshe, elde qamauda otyrǵan sayası tūtqyndar sany shamamen 800-ge juyq. Olardyń edáuír bólígí Nıkolas Maduronyń 2024 jyly qaıta saılanuyna qarsy narazylyqtardan keıín ūstalǵan. Halyqaralyq qūrylymdar Venesuelada adam qūqyqtarynyń óreskel būzyluyn jıí tírkep keledí.
Qūqyq qorǵaushy Marta Tıneonyń aıtuynsha, tūtqyndar "Gelıkoıd" (El Helicoide) ortalyǵynan da bosatylyp jatyr. Būl mekeme qatań ūstau jaǵdaılarymen jáne bılíkke qarsy opponentterge qatysty azaptau turaly habarlamalarymen belgílí.