Áıeldíń aıtuynsha, júktílík kezínde tapsyrys berushíler oǵan tūraqty túrde aı saıyn shamamen 200 myń teńge tólep tūrǵan, – dep habarlaıdy aqshamnews.kz tílshísí.
27 jastaǵy Krıstına Gavrılyuk Qytaıdan kelgen erlí-zaıypty úshín bala kóteruge kelísken. Embrıondy salu protsedurasy Almatydaǵy klınıkalardyń bírínde jasalǵan.
Áıeldíń aıtuynsha, júktílík kezínde tapsyrys berushíler oǵan tūraqty túrde aqsha audaryp otyrǵan. Aı saıyn shamamen 200 myń teńge tólep tūrǵan.
Alaıda bosanu merzímínen erte — júktílíktíń jetínshí aıynda bolǵan. Shala tuǵan ūl dúnıege kelgennen keıín, Krıstınanyń aıtuynsha, bıologıyalyq ata-anasy balany aludan bas tartqan.
- Kesar tílígínen keıín balany bírden bólímshege alyp kettí. Keıín dárígerler náresteníń jaǵdaıy jaqsy ekenín aıtty, – deıdí ol.
Alǵashynda bıologıyalyq ata-anasy medıtsınalyq taldaular jasaudy talap etíp, keıín DNQ saraptamasyn ótkízudí sūraǵan. Tekseru nátıjesí balanyń rasymen solardyń perzentí ekenín rastaǵan. Bíraq sodan keıín olarmen baılanys bírtíndep úzílíp ketken.
Krıstınanyń aıtuynsha, bastapqyda ol kurator arqyly sóılesken. Keıín bıologıyalyq ana baılanysqa shyqpaı, balany alyp ketudí sūraǵan.
Krıstına satushy bolyp jūmys ísteıdí jáne 6 jastaǵy qyz tárbıelep otyr. Būǵan deıín ol ekí ret surrogat ana bolǵan jáne ol jaǵdaılardyń bárí qıyndyqsyz ótken. Al būl joly, áıeldíń aıtuynsha, ol uáde etílgen syıaqysyn ala almaı qalǵan.
Bosanǵannan keıín Krıstına jańa tuǵan sábıden resmı túrde bas tartqan. Qazír náreste sábıler úıínde.
Áıel polıtsıyaǵa júgíngenímen, qūqyq qorǵau organdary qylmystyq ís qozǵaudan bas tartqan. Almaty qalalyq polıtsıya departamentí būl jaǵdaıda qylmystyq nemese ákímshílík qūqyqbūzushylyq belgílerí anyqtalmaǵanyn málímdedí.
Krıstınaǵa máselení azamattyq sot arqyly sheshuge keńes berílgen.
Zańgerler ne deıdí?
Zańgerlerdíń aıtuynsha, Qazaqstanda surrogat ana bolu zańmen rūqsat etílgen jáne «Neke (erlí-zaıyptylyq) jáne otbasy turaly» zańmen retteledí. Qūjatta surrogat ananyń qūqyqtary, sonyń íshínde kelísílgen syıaqyny alu máselesí de qarastyrylǵan.
Qūqyq qorǵaushylar áıelge sotqa júgínuge keńes beredí. Sonymen qatar, bıologıyalyq ata-analar Qytaı azamattary bolǵandyqtan, Qazaqstandaǵy Qytaı elshílígíne jáne Syrtqy íster mınıstrlígíne de ótínísh jasaudy ūsynady.
Zańgerlerdíń píkírínshe, ata-analardyń áreketí ata-analyq míndetterdí oryndamau retínde qarastyryluy múmkín, óıtkení olar balany tastap, elden ketíp qalǵan.
Qazírgí uaqytta jańa tuǵan sábı dárígerlerdíń baqylauynda. Mamandar onyń jaǵdaıyn tūraqty dep baǵalap otyr — bala bírtíndep salmaq qosyp keledí. Ázírge onyń mártebesí – ata-anasy bas tartqan bala. Náresteníń árí qaraıǵy taǵdyryn memleket sheshedí.