Urpaq tárbıesinde dástúrge keńinen oryn berý qansha aıtsa da jaýyr bolmaıtyn taqyryp. Jaqynda №107 lıseıde uıymdastyrylǵan semınar «Qazaq halqynyń ulttyq qundylyqtary – bala tárbıesindegi qundylyq kózi» degen jyp-jyly ataýmen ótti. Tól qundylyqtyq urpaq tárbıesindegi mańyzy basa aıtylǵan ıgi shara «Birtutas tárbıe» baǵdarlamasy aıasynda ótip otyr. Onyń ústine mektep dırektorlarynyń tárbıe isi jónindegi orynbasarlaryna baǵyttalǵanyn da aıta ketken jón.
Mazmundy sharaǵa qatysqan bilim salasynyń ókilderi ózderine oımaqtaı bolsyn oı túıip qaıtary sózsiz. Sol rette №107 lıseı dırektory Ú.Aqatanulynyń myna bir pikirin alǵa tarta keteıik:
«Ulttyq qundylyqtardy boıyna sińirgen eńbekqor, adal, sanaly jasampaz azamatty tárbıeleý bizdiń basty maqsatymyz. Halqymyzda «Tárbıe – talbesikten» degen sóz beker aıtylmasa kerek. Otbasynan bastaý alatyn tárbıe mektepte jalǵasyn taýyp jatady. Sondyqtan bizdiń aldymyzda óte jaýapty mindet – boıynda ımany bar, ulttyq qundylyqty túısine biletin urpaq tárbıeleý máselesi tur».
Semınar barysynda «ÓRKEN» balalardyń ál-aýqatyn arttyrý ulttyq ǵylymı-praktıkalyq ınstıtýty KeAQ aǵa ǵylymı qyzmetkeri Erbolat Seksenbaıulynyń «Mektep pen otbasynyń yntymaqtastyǵy – tabysty tulǵany tárbıeleýdiń faktory» jáne B.Dosynbekovanyń «Birtutas tárbıe baǵdarlamasy: «Qazaq halqynyń ulttyq qundylyqtary – bala tárbıesindegi qundylyq kózi» dep atalatyn tanymdyq dúnıeleri asa qyzyǵýshylyq týǵyzdy.
Sonymen qatar, semınar qonaqtary A.Nadyrbekovanyń uıytqy bolýymen ótken «Jeti atasyn bilgen ul, jeti jurttyń qamyn jer» dep atalatyn ashyq tárbıe saǵatyna qatysty. Ulttyq qundylyq týraly aıtqanda halqymyzdyń ulttyq oıyndary týraly aıtpaý múmkin emes. Jas urpaq tárbıesinde ulttyq oıynnyń mańyzy óte zor. Sondyqtan sońǵy jyldary «Toǵyzqumalaq» oıyny mektepterde keńinen qolǵa alyna bastady. Qazirgi tańda pán retinde de oqytylyp júr. Ulttyq oıyndy A.Imanqul men D.Jetenbaev uıymdastyrdy. Sonymen qatar, «Zamanaýı tehnologıalar ulttyq dástúrlerdi joıyp jibere me?» dep atalatyn debat sońy «Atadan – ósıet, anadan – qasıet» atty jańa formattaǵy ata-analar jınalysyna ulasty.