Elektrondyq formattaǵy ŪBT ótkízu merzímderí belgílendí, dep habarlaıdy aqshamnews.kz
Ǵylym jáne joǵary bílím mınıstríníń m. a. 2025 jylǵy 3 shíldedegí būıryǵymen Ūlttyq bíryńǵaı testíleudí ótkízu qaǵıdalaryna ózgeríster engízíldí.
Ūlttyq bíryńǵaı testíleuge (ŪBT) qatysuǵa ótínísh bergen, bíraq testíleuge qatyspaǵan, sondaı-aq ótínísh beru kezeńínde ŪBT-ǵa qatysuǵa ótínísh bermegen talapkerlerge testíleu kúnderí audıtorıyada bos oryn bolǵan jaǵdaıda (qaǵaz formattaǵy testíleu úshín tıístí testíleu tílínde) kelesí negízdí sebepter boıynsha ŪBT-ǵa qaıta tírkelíp, bír kúnde qatysu múmkíndígí beríledí:
densaulyq jaǵdaıy boıynsha №026/u nysanyna sáıkes dárígerlík-konsultatsıyalyq komıssıyanyń qorytyndysy nemese ambulatorıyalyq kartanyń ne auru tarıhynyń kóshírmesí bolǵan jaǵdaıda, ol testíleu kúnímen sáıkes keluí tıís;
jaqyn tuystarynyń qaıtys boluyn rastaıtyn qūjattar bolǵan jaǵdaıda;
jalpy bílím beretín pánder boıynsha respublıkalyq jáne halyqaralyq olımpıadalarǵa, ǵylymı jobalar (ǵylymı jarystar) baıqaularyna, oryndaushylar baıqaularyna, kásíptík sheberlík konkurstaryna jáne sporttyq jarystarǵa qatysqan jaǵdaıda;
tótenshe jaǵdaılar bolǵan jaǵdaıda.
Qaǵaz formatyndaǵy ŪBT-da talapker tıístí qūjattardy qosa bere otyryp, memlekettík komıssıya tóraǵasynyń atyna qaıta testíleuge ótínísh beredí.
Elektrondyq formattaǵy ŪBT-da talapker Ūlttyq testíleu ortalyǵy dırektorynyń atyna ótínísh beredí.
Sonymen qatar, elektrondyq formattaǵy ŪBT mynadaı merzímderde ótkízíledí:
1) 10 qańtar – 10 aqpan aralyǵynda:
jalpy orta bílím beru ūıymdarynyń 11 (12) synyp bítírushílerí – óz qalauy boıynsha joǵary oqu oryndaryna (JOO) aqyly negízde qabyldanu úshín;
aldyńǵy jyldardaǵy mektep túlekterí, tehnıkalyq jáne kásíptík nemese orta bílímnen keıíngí bílím beru ūıymdarynyń túlekterí – respublıkalyq nemese jergílíktí byudjet qarajatynan bílím beru grantyn taǵaıyndau konkursyna qatysu nemese aqyly negízde JOO-ǵa qabyldanu úshín;
shetelde oqyǵan mektep túlekterí, sondaı-aq shetelde bílím alǵan, Qazaqstan Respublıkasynyń azamattary bolyp tabylmaıtyn qazaq ūltynyń ókílderí – joǵarydaǵy maqsattar úshín;
kúndízgí bólímde aqyly negízde oquǵa qabyldanǵan, bíraq ŪBT nátıjesí boıynsha shektí ball jınamaǵan, beıíndík pánder kombınatsıyasy sáıkes kelmeıtín nemese ŪBT nátıjelerí joıylǵan talapkerler – sol jyly qaıtadan aqyly negízde JOO-ǵa qabyldanu úshín;
shyǵarmashylyq dayarlyqty talap etetín bílím beru baǵdarlamalary boıynsha oqıtyn jáne basqa bílím beru baǵdarlamalaryna auysqysy keletín studentter – aqyly negízde;
pedagogıkalyq ǵylymdar salasyna auysqysy keletín studentter – aqyly negízde.
2) 1 nauryz – 6 sáuír aralyǵynda:
joǵaryda kórsetílgen tūlǵalar úshín, sondaı-aq joǵary oqu oryndaryna aqyly nemese grant negízínde túsu maqsatynda.
3) 10 mamyr – 10 shílde aralyǵynda:
osy jylǵy mektep bítírushíler – grant konkursyna qatysu, JOO-ǵa aqyly negízde qabyldanu nemese memlekettík tapsyrys boıynsha oqu úshín;
aldyńǵy jyldardaǵy mektep túlekterí, tehnıkalyq jáne kásíptík nemese orta bílímnen keıíngí bílím beru ūıymdarynyń túlekterí – joǵarydaǵy maqsattar úshín;
qysqartylǵan oqu merzímderín kózdeıtín joǵary bílím beru baǵdarlamalary boıynsha túsetín kolledj túlekterí – grant konkursyna qatysu úshín;
shetelde oqyǵan mektep túlekterí jáne shetelde bílím alǵan qazaq ūltynyń ókílderí – joǵarydaǵy maqsattar úshín;
aqyly bólímde kúndízgí oqu nysanynda oquǵa qabyldanǵan, bíraq shektí ball jınamaǵan, beıíndík pánder kombınatsıyasy sáıkes kelmeıtín nemese ŪBT nátıjelerí joıylǵan talapkerler – sol jyly qaıtadan aqyly negízde JOO-ǵa qabyldanu úshín.
Būl merzímde ŪBT tapsyrǵan tūlǵalar úshín beıíndík pánderdí ózgertuge jol berílmeıdí.
4) 10 – 20 tamyz aralyǵynda:
osy jylǵy mektep bítírushíler men aldyńǵy jyldardaǵy mektep nemese kolledj túlekterí – joǵarydaǵy maqsattar úshín;
shyǵarmashylyq dayarlyqty talap etetín bílím beru baǵdarlamalarynan basqa baǵdarlamalarǵa auysqysy keletín studentter – aqyly negízde;
pedagogıkalyq baǵyttarǵa auysqysy keletín studentter – aqyly negízde.
Sonymen qatar, eger halyqaralyq nemese sheteldík oqu oryndary (nemese olardyń fılıaldary) Quacquarelli Symonds, Academic Ranking of World Universities, Times Higher Education halyqaralyq akademıyalyq reıtıngteríníń TOP-250-na jáne/nemese Ekonomıkalyq yntymaqtastyq jáne damu ūıymy (EYDŪ) men BRIKS elderíníń ūlttyq reıtıngteríníń TOP-100-na kírse, onda 1 jáne 2-tarmaqtarda kórsetílgen merzímderde ótkízílgen ŪBT nátıjelerí respublıkalyq byudjet esebínen bílím beru grantyn taǵaıyndau konkursyna qatysu úshín jaramdy bolyp tabylady.
Būıryq 2025 jylǵy 3 shíldeden bastap kúshíne enedí jáne 2025 jylǵy 1 shíldeden bastap tuyndaǵan qūqyqtyq qatynastarǵa qoldanylady.