Qazaqstannyń Ǵylym jáne joǵary bílím mınıstrlígí bílím men talantty damytu salasyndaǵy halyqaralyq ūıym – ETS (Educational Testing Service) kompanıyasymen yntymaqtastyq ornatqanyn habarlady.
Būl qadam Ūlttyq bíryńǵaı testíleu (ŪBT) júıesín túbegeılí jańǵyrtuǵa baǵyttalǵan.
Mınıstrlíktíń málímetínshe, aldaǵy uaqytta ŪBT formaty ózgeredí. Endí testíleu tek akademıyalyq bílímdí ǵana emes, sonymen bírge ómírlík mańyzdy daǵdylardy da baǵalaıtyn júıege aınalmaq.
Jańartylǵan formattyń basty maqsaty – barlyq talapkerlerge teń múmkíndík pen ádíl baǵalau júıesín qamtamasyz etu. Būl úshín test kombınatsıyalary ıkemdí, baǵalau júıesí bíryńǵaı, al qoljetímdílík — aımaq, mektep nemese oqytu tílíne qaramastan teń bolmaq.
Jasandy ıntellekt pen jańa tehnologıyalar engízíledí
– Jasandy ıntellekt tehnologıyalaryn paıdalanu, sonyń íshínde beıímdelmelí testíleu, avtomattandyrylǵan baǵalau jáne ıntellektualdy analıtıka ádísterí testíleu protsesíníń ádíldígín, senímdílígín jáne obektıvtílígín arttyrady. Barlyq test zamanauı psıhometrıyalyq ádístermen daıyndalady, būl olardyń ǵylymı negízdílígín, dáldígín jáne studentter, joǵary oqu oryndary men jūmys berushíler tarapynan halyqaralyq deńgeıde moıyndaluyn qamtamasyz etedí, – delíngen mınıstrlík habarlamasynda.
ETS – álemdík deńgeıde TOEFL jáne GRE sıyaqty testílerdí ázírleıtín jetekshí ūıym. Qazaqstanmen áríptestík ayasynda ŪBT formatynyń sapasy men senímdílígín halyqaralyq standarttarǵa sáıkestendíru kózdelgen.
