Halyqaralyq áıelder kúní qarsańynda sáttí jasalǵan operatsıyanyń nátıjesínde 18 jastaǵy almatylyq qyz ómírge ekínshí ret keldí desek bolady, – dep habarlaıdy aqshamnews.kz tílshísí.
Kardıologıya jáne íshkí aurular ǵylymı-zertteu ınstıtutynda Reseı ǵylym akademıyasynyń professory, medıtsına ǵylymdarynyń doktory Sergeı Artemenkonyń qatysuymen ótken master-klass ayasynda júrektíń tua bítken patologıyasy bar student qyzǵa kúrdelí operatsıya jasaldy.
Patsıent 2025 jyldyń jazynan bastap mazalap júrgen júrek qaǵysynyń jıíleuí, bas aınalu jáne bas auruy sıyaqty shaǵymdarmen tústí. Oǵan ehokardıografıya, EKG holterlík monıtorıngí jáne zerthanalyq taldaular júrgízíldí. Tekseru nátıjesínde PQ ıntervalynyń qysqaruy, yaǵnı elektrlík ımpulstíń júrekshelerden qarynshalarǵa tym jyldam ótuí, delta-tolqynnyń boluy jáne Volf–Parkınson–Uaıt sındromynyń basqa da belgílerí anyqtaldy. Būl sındrom keı jaǵdaıda jasyryn túrde ótuí múmkín (jasyryn túrí ádette elektrofızıologıyalyq zertteu arqyly anyqtalady). Atalǵan sındrom júrekte qosymsha elektr ótkízgísh jolynyń boluymen baılanysty.
Patsıenttí júrek yrǵaǵy men ótkízgíshtígíníń būzyluy bólímshesíníń ınterventsıyalyq arıtmology Bauyrjan Erbolatov qarap, oǵan júrek íshílík elektrofızıologıyalyq zertteu jáne qosymsha ótkízgísh joldy radıojıílíktík ablyatsıya ádísímen joyu úshín auruhanaǵa jatu ūsynyldy.
Būl klınıkalyq jaǵdaıdyń erekshelígí – qosymsha ótkízgísh jol júrektíń negízgí ótkízgísh júıesíne óte jaqyn ornalasqan. Mūndaı ornalasu kenetten júrek toqtap qalu qaupín arttyrady.
Zamanauı 3D-navıgatsıyalyq júıeníń kómegímen júrekke tolyq elektroanatomıyalyq karta jasaldy. Qosymsha ótkízgísh jolǵa radıojıílíktík ablyatsıya sáttí oryndaldy.
Operatsıya 4 saǵatqa sozyldy. Būl patologıyalyq ótkízgísh joldyń anatomıyalyq ornalasuynyń kúrdelílígímen baılanysty boldy.
«Bízdíń klınıkada júrek yrǵaǵy men ótkízgísh júıesíníń būzylystary kezínde jasalatyn barlyq hırurgıyalyq aralasular oryndalady. Bízde joǵary tehnologıyalyq zamanauı jabdyqtar, sonyń íshínde 3D-kartografıyaǵa arnalǵan navıgatsıyalyq júıeler bar. Sheteldík mamandardyń qatysuymen tūraqty túrde master-klastar ótkízílíp tūrady. Qazírgí uaqytta Reseı ǵylym akademıyasynyń professory Sergeı Artemenkonyń qatysuymen júrek yrǵaǵynyń kúrdelí būzylystaryn emdeuge arnalǵan master-klass ótude. Osy master-klass ayasynda MÁMS esebínen 30 operatsıya (júrek íshílík elektrofızıologıyalyq zertteu jáne radıojıílíktík ablyatsıya) jasau josparlanǵan. Bízdíń ortalyqta joǵary bílíktí mamandar jūmys ísteıdí, qyzmetkerler zamanauı emdeu ádísterí boıynsha únemí bílíktílígín arttyryp otyrady», – deıdí bólímshe meńgerushísí Baǵdat Ahyt.
Qazírgí uaqytta patsıenttíń jaǵdaıy jaqsy, ol belsendí, bólímshede ózdígínen qozǵalyp júr. EKG baqylau holterlík monıtorıngí júrgízílude. Patsıenttí jaqyn kúnderí auruhanadan shyǵaru josparlanyp otyr
