2026 jyldyń 20–29 qańtar aralyǵynda Almaty qalasy aýmaǵynda otbasylyq-turmystyq qatynastar salasynda jasalatyn quqyq buzýshylyqtardyń aldyn alý jáne jolyn kesýge baǵyttalǵan «Turmys» atty qalalyq jedel-profılaktıkalyq is-sharasy ótkiziledi.
İs-sharanyń negizgi maqsaty – turmystyq qylmystar deńgeıin tómendetý, azamattardyń ómiri men densaýlyǵyn qorǵaý, sondaı-aq otbasyndaǵy zorlyq-zombylyqtyń aldyn alý. Jedel-profılaktıkalyq is-shara aıasynda polısıa qyzmetkerleri profılaktıkalyq esepte turǵan tulǵalardy tekserý, qolaısyz otbasylardy aralaý, sondaı-aq halyq arasynda túsindirý jumystaryn júrgizý sıaqty keshendi profılaktıkalyq sharalardy júzege asyrady.
Almaty qalasy polısıa Departamenti Qoǵamdyq qaýipsizdik basqarmasynyń otbasylyq-turmystyq zorlyq-zombylyqqa qarsy kúres bóliminiń bastyǵy polısıa podpolkovnıgi Qantarbaeva Jadra Djeleýovna atap ótkendeı: «„Turmys“ atty jedel-profılaktıkalyq is-sharasyn ótkizý, eń aldymen, otbasylyq-turmystyq janjaldardyń aýyr saldarynyń aldyn alýǵa baǵyttalǵan. Bizdiń basty mindetimiz – problemalyq jaǵdaılardy der kezinde anyqtaý, jábirlenýshilerge kómek kórsetý jáne turmystyq salada quqyqqa qarsy áreketterge jol beretin tulǵalarǵa qatysty tıisti sharalar qabyldaý».
İs-shara barysynda profılaktıka organdarymen, áleýmettik qorǵaý jáne jergilikti ózin-ózi basqarý organdarymen ózara is-qımylǵa, sondaı-aq azamattardyń habarlamalaryna jedel den qoıýǵa erekshe nazar aýdarylady. Quqyq qorǵaý organdary óńir turǵyndaryn beıjaı qaramaýǵa jáne otbasylyq-turmystyq zorlyq-zombylyq faktileri nemese onyń jasalý qaýpi týraly polısıa organdaryna ýaqtyly habarlaýǵa shaqyrady.