Túrkístan oblysynda qart ákesín soqqyǵa jyqty dep aıyptalǵan er adamǵa qatysty sot protsesí bastaldy, dep habarlaıdy Aqshamnews.kz tílshísí.
Aıyptalushy Qosseıít auylynyń 41 jastaǵy tūrǵyny Almas Sadaqbaev. Oǵan dármensíz kúıdegí ákesín azaptady jáne densaulyǵyna qasaqana ortasha auyrlyqtaǵy zıyan keltírdí degen aıyp taǵylyp otyr.
Ís Jetísaı audandyq sotynda qaralyp jatyr. Búgíngí otyrysta kuágerler jauap berdí. Olardyń aıtuynsha, qarıyaǵa kórsetílgen qorlyq túsírílgen vıdeo aldymen jergílíktí chattarda taraǵan.
Kuáger retínde auyldyq ambulatorıya dárígerí Gúljan Chukmanova sotta málímdeme jasap, chattaǵy vıdeony kórgennen keıín Qosseıít auyldyq okrugíníń ákímí Nūrbol Jaınarǵa habarlasqanyn aıtty. Ol ákímnen qarıyanyń jaǵdaıyn baryp kórudí jáne aıyptalushymen sóılesudí sūraǵan.
Ákím Nūrbol Jaınardyń aıtuynsha, ol úıge barǵan kezde aqsaqal tósekte jatqan, alaıda kútímí jaqsy bolǵan. Sondaı-aq ákím vıdeony aıyptalushynyń ákesí qaıtys bolǵannan keıín ǵana kórgenín jetkízdí. Ol Sadaqbaevty áńgímege shaqyryp, kezdesuge uchaskelík polıtsıya qyzmetkerín de qatystyrǵan.
Almas Sadaqbaev ózíne taǵylǵan aıypty moıyndamaı, ákesíne qorlyq kórsetkenín joqqa shyǵarǵan. Ol qarttyń jaǵdaıy óte auyr bolǵanyn jáne kútím jasaudyń qıynǵa soqqanyn alǵa tartqan. Málímet boıynsha, qarıya 2 qyrkúıekte kóz jūmǵan. Jergílíktí dárígerler ólím tabıǵı sebepterden bolǵany jónínde anyqtama beríp, marqūm jerlengen.
Alaıda qylmystyq ís qozǵalǵannan keıín tergeu barysynda máıít eksgumatsıyalanǵan.
Eske salaıyq, 2025 jyldyń qyrkúıegínde Túrkístan oblysynda er adamnyń óz ákesín balaǵattap, qorlap, ūryp-soqqan vıdeosy áleumettík jelíde taraǵan edí. Osydan keıín polıtsıya kúdíktíní qamauǵa alyp, oǵan ekí bap boıynsha aıyp taqqan.