Túrkistan oblysynda óz balasy uryp óltirgen aqsaqaldyń denesi qara jer qoınynan qaıta qazyp alyndy, - dep habarlaıdy Aqshamnews.kz tilshisi "KTK" telearnasyna silteme jasap.
Eksgýmasıa jasalǵan máıitke mamandar sot-medısınalyq saraptama júrgizip, marqumnyń naqty neden kóz jumǵanyn anyqtamaqshy.
Bul oqıǵa Shardara aýdanyndaǵy Qosseıit aýylynda bolǵan edi. Júregi jáne omyrtqasy aýyratyn aqsaqaldy óz balasy balaǵattap, soqqynyń astyna alǵan. Bul jaǵdaıdy kórshisi jasyryn telefonǵa túsirip, áleýmettik jelige jarıalaǵan bolatyn. Qaýqarsyz qarıaǵa kelini de qol kóterip, aýyr sózder aıtqany anyqtaldy.
Keıin kelininen, balasynan ońbaı taıaq jegen áke kóz jumdy. Osydan keıin Shardaranyń aıtýly asabasy ári meshitte azanshy bolǵan ozbyr qamaýǵa alyndy. Onyń áıeline de polıseıler «uryp-soǵý» babymen is qozǵaǵan. Endi sot-medısınalyq saraptama marqumnyń uly men kelininiń qolynan ólgenin rastasa, kúdiktilerdiń jazasy aýyrlaýy múmkin.