Qazaqstandaǵy kurorttyq aımaqtarda júrgízílgen tekserísterden keıín bírneshe sheneuník jauapkershílíkke tartyldy, - dep habarlaıdy Aqshamnews.kz tílshísí Úkímettíń baspasóz qyzmetíne sílteme jasap.
Būǵan deıín Prezıdent Qasym-Jomart Toqaev Alakól kólí mańyndaǵy tanymal turıstík aımaqtyń demalushylardy qabyldauǵa daıyndyq deńgeıíníń tómen ekenín Úkímettíń nazaryn audarǵan bolatyn. Memleket basshysy qajettí turıstík ınfraqūrylymnyń, sapaly qyzmettíń jáne qauípsízdíktíń joqtyǵyn atap ótíp, qysqa merzím íshínde kurorttarda tártíp ornatyp, kínálílerdí jazalaudy tapsyrdy.
Prezıdenttíń synynan keıín Bektenov vıtse-premer men mınıstrdí óńírlerge jíberdí.
Kímder jazalandy?
Tekseru nátıjesínde kelesí lauazymdy tūlǵalarǵa tártíptík sharalar qoldanyldy: Turızm jáne sport salasyn qadaǵalaıtyn vıtse-mınıstr men Almaty, Qaraǵandy, Abaı jáne Jetísu oblysy ákímderíníń turızmge jauapty orynbasarlaryna qatań sógís jarıyalandy; Qonaev jáne Balqash qalalarynyń, Alakól jáne Maqanshy audandarynyń, sondaı-aq keıbír auyldyq okrug ákímderíne sógís jarıyalandy; Kásípkerlík, turızm, qorshaǵan ortany qorǵau, sáulet jáne sauda salalaryna jauapty oblystyq basqarma basshylaryna tártíptík sharalar qoldanyldy;
Ekologıya jáne tabıǵı resurstar, densaulyq saqtau, qarjy, su resurstary jáne ırrıgatsıya, sauda jáne ıntegratsıya, kólík mınıstrlíkteríníń óńírlík bólímsheleríníń basshylary da jauapkershílíkke tartyldy. Sonymen qatar, ortalyq memlekettík organdar ókílderíníń qatysuymen jergílíktí tekseruler júrgízílíp jatyr.
Úkímet málímetínshe, osy tekseruler nátıjesínde turıstík ınfraqūrylymdy damytu jóníndegí Jol kartasy ázírlenedí. Onda saladaǵy júıelí máselelerdí sheshuge baǵyttalǵan alǵashqy kezektegí sharalar belgílenedí.