Prezıdent memlekettík marapat jáne áskerı shen tapsyru rásímínde sóz sóıledí, – dep habarlaıdy aqshamnews.kz tílshísí.
Memleket basshysy – Qazaqstan Qaruly Kúshterí Joǵarǵy Bas Qolbasshysy Qasym-Jomart Toqaev sardarlar men sarbazdardy, jıynǵa qatysushylardy Otan qorǵaushy kúnímen jáne Jeńís kúnímen qūttyqtady.
– Qos merekeníń mán-mazmūny – úndes, taǵylymy – ortaq. Osy meıramdarda elímízdíń erlík dástúrí keńínen dárípteledí. Bíz būl kúnderí jūrtymyzǵa qorǵan bolyp júrgen erlerge qūrmet kórsetemíz. Sondaı-aq sūrapyl soǵysta Otan úshín ot keshken batyrlardyń ruhyna taǵzym etemíz. Qazaq – shekarasyn aq naızanyń ūshymen, aq bílektíń kúshímen bekemdegen qaharman halyq, erjúrek ūlt. Batyr babalarymyz el taǵdyry synǵa túsken sátte bír Tudyń astyna jınalǵan. Bírlígín nyǵaıtyp, jūrtyn jaudan qorǵaǵan. Baıtaq dalany kózdíń qarashyǵyndaı saqtap, ūrpaqqa amanat etken. Osy amanatqa adal bolu – bízdíń qasterlí boryshymyz. Bírtūtas Qazaqstan halqy mūny jaqsy túsínedí. Nauryz aıyndaǵy konstıtutsıyalyq reforma – sonyń aıqyn dálelí. Sayası nauqan kezínde bíz eń aldymen óskeleń ūrpaq aldyndaǵy jauapkershílíktí tereń sezíne otyryp, tarıhı tańdauymyzdy jasadyq. Bárímíz bír el bolyp, jańa Konstıtutsıyany qabyldadyq. Mūny ūlt bolashaǵyna tíkeleı yqpal etetín asa mańyzdy sheshím desek, qate bolmaıdy, – dedí Prezıdent.
Qasym-Jomart Toqaev Konstıtutsıya memlekettígímíz ben egemendígímízdíń myzǵymas kepílí ekenín atap óttí.
– Bas qūjatta halqymyzdyń múddesí, maqsat-mūraty men bíregeı qūndylyqtary kórínís tapty. Jańa Ata zańda Egemendík pen Táuelsízdíktí qorǵau, azamattardyń qūqyqtary men bostandyqtaryn saqtau, halqymyzdyń ál-auqatyn arttyru, bírlígín kúsheıtu būljymas qaǵıdat retínde aıqyndaldy. Adam kapıtalyn, bílím-ǵylymdy, ınnovatsıyany damytu memleket qyzmetíníń strategıyalyq baǵyty retínde bekítíldí. Osylaısha, bíz Zań men tártíp ústemdík qūratyn, barshaǵa bírdeı múmkíndík beríletín, Ádílettí, Quatty, Órkenıettí memleket qūru jolyna bet aldyq. Qazaqstannyń maqsaty – bıík, baǵdary – aıqyn. Yrysty yntymaǵymyzdy jáne berekelí bírlígímízdí saqtaı bílsek, osy mūratymyzǵa jetemíz, – dedí Memleket basshysy.