Memleket basshysy Qasym-Jomart Toqaev Astanany damytu jóníndegí keńeste sóz sóıledí, - dep habarlaıdy aqshamnews.kz tílshísí.
"Qazír Astana qarqyndy ósíp keledí. Túrlí baǵyt boıynsha belsendí jūmys ístelíp jatyr. Búgín elordany damytudyń ózektí máselelerín talqylaımyz. Sońǵy 11 aıda qysqa merzímge arnalǵan ekonomıkalyq ındıkator 118,6 paıyzǵa jettí. Investıtsıya, qūrylys, shaǵyn jáne orta bıznes salasyndaǵy kórsetkíshter boıynsha Astana aldyńǵy orynda tūr. Elordanyń kósh basynda boluy – zańdylyq", - dedí Toqaev.
Bıyl elordadaǵy tūrǵyn úı qūrylysy 5 mıllıonǵa juyq sharshy metrdí qūraıdy. Būl elímízde paıdalanuǵa berílgen baspananyń tórtten bírí jáne Ortalyq Azıya aımaǵyndaǵy basqa astanalardyń kórsetkíshterínen bírneshe ese artyq.
"Óńdeu ónerkásíbí ónímíníń kólemí 2025 jyldyń 11 aıynda 2,8 trıllıon teńgege jetíp, 7,2 paıyz óstí. Yaǵnı 6 mıllıard dollar shamasynda. Bıylǵy 11 aıda sauda kólemí 10,8 trıllıon teńgeden asyp, 8,4 paıyz ósím kórsetken Būl –shamamen 22,5 mıllıard dollar. Maǵan berílgen málímet boıynsha, qala byudjetíne 4,3 trıllıon teńge salyq túsken. Mūny qomaqty qarjy deuge bolady. Astananyń 2024 jylǵy óńírlík jalpy óním kólemí 15 trıllıon teńgeden sál asty. Būl – 32 mıllıard dollar. Bıylǵy qorytyndy boıynsha 34, típtí, 35 mıllıard dollar (17 trıllıon teńge nemese odan da joǵary) bolady dep kútílude. Al qaladaǵy halyqtyń resmı sany 1,6 mıllıon adamǵa jetken", - dedí Toqaev.