Memleket basshysy Qasym-Jomart Toqaevtyń Turkistan gazetíne bergen kólemdí sūhbaty jarıyalandy, - dep habarlaıdy aqshamnews.kz tílshísí.
Prezıdent turızm salasy turaly sūraqqa jauap beríp, Almatyǵa toqtaldy. Sondaı-aq, qala ákímíne naqty tapsyrma berdí.
"Turızmníń damuyna tūmsa tabıǵatty qorǵau degen jeleumen kez kelgen jobaǵa qarsy nauqan ūıymdastyratyn keıbír "eko-belsendíler" zıyan keltíríp otyr. Kópshílígíníń tabıǵatta sharuasy da joq. Olar ózíníń tanymaldyǵyn arttyru úshín qoǵamdy dúrlíktírudí, qazírgí tílmen aıtqanda, "haıp" jasaudy ǵana kózdeıdí. Turızm bıznesínde ábden ákkí bolǵan, básekelesterdíń shyqqanyn qalamaıtyn kásípkerler keıde olardyń qoltyǵyna su búrkíp otyrady.
Tau shańǵysy turızmíne qatysty jaǵdaı da osyǵan ūqsas. "Shymbūlaq" Almaty qalasynyń ortalyǵynan nebárí jarty saǵattyq jerdegí erekshe tabıǵattyń ortasynda tūr. Álemde oǵan teń keletín demalys orny kemde-kem. Alaıda, kópten berí eshteńe jasalmaǵan kurorttyń syny da, syry da ketíp, tozyp barady. Tabıǵattyń tamasha tartuy sanalatyn osy kóríktí mekendí damytu úshín tyń tásílder qajet. Qazír elímízdegí tájírıbelí developerlík kompanıya íske kírístí. Bíraq, Úkímet pen ákímdíktíń qoldauyna qaramastan, jūmys barysy daıyndyq jáne tanystyru sharalarynan asa qoıǵan joq. Al, kórshí elderde tau shańǵysy ınfraqūrylymy qarqyndy salynyp jatyr.
Almaty tau klasteríníń áleuetí óte zor. Būl salada auqatty adamdarǵa da, ortasha tabysy bar azamattarǵa da bírdeı qyzmet kórsetíluge tıís. Sondyqtan ondaǵy turıstík ınfraqūrylymdy ártaraptandyru máselesíne nazar audaru qajet.
Turızm salasyndaǵy kadr tapshylyǵy – óte ózektí másele. Sondyqtan Túrkístanda Halyqaralyq turızm jáne meımandostyq unıversıtetí ashyldy. 2024 jyly oqu ordasynyń alǵashqy túlekterí dıplomdaryn alyp, eńbek naryǵyna qosyldy. Alaıda, būl – jetkílíksíz. Kadr máselesín sheshu úshín qosymsha sharalar qabyldanady.
Degenmen, salymyz suǵa ketíp, eńsemízdí túsíríp otyruǵa da bolmaıdy. Álemdík deńgeıdegí tabloıdtar sayahatshylarǵa Qazaqstanda demaludy ūsynyp jatsa, ekí ese qarqynmen jūmys ísteuímíz kerek. CNN Travel 2025 jyly Almatyny Ortalyq Azıyadaǵy "sání men saltanaty jarasqan jańa astana" dep atady. Almaty ákímíne shahardy kúndíz-túní qonaǵy úzílmeıtín Nyu-Iork, Máskeu, Parıj sıyaqty "eshqashan kóz ílmeıtín qalaǵa" aınaldyru tapsyryldy. Qalada ınfraqūrylymdy jaqsartu, abattandyru, jaryqtandyru baǵytynda álí de kóp jūmys ísteluí kerek"