Toqaev áıelderdí 8 nauryz merekesímen qūttyqtady, – dep habarlaıdy aqshamnews.kz tílshísí.
Memleket basshysy Qasym-Jomart Toqaev áıelderdí 8 nauryz - Halyqaralyq áıelder kúnímen qūttyqtady.
""Qymbatty hanymdar! Sízderdí Halyqaralyq áıelder kúnímen shyn júrekten qūttyqtaımyn!
Osy tamasha meıram – barsha názík jandylar qauymyna arnalǵan erekshe sezím men zor qūrmettíń jarqyn kórínísí. Áıel – kóńílge shattyq syılap, shabytqa qanat bítíretín kórkemdík pen sūlulyqtyń sımvoly, jasampazdyq pen jańashyldyqtyń qaınar kózí. Dúnıedegí jaqsylyq ataulynyń bárí áıel zatynan bastau alady.
Áıeldíń jany názík bolsa da, bolmysy – myqty. Olar kez kelgen qıyndyqty eńseríp, árdaıym danalyq pen daralyqtyń, shydamdylyq pen batyldyqtyń, senímdílík pen jauapkershílíktíń ozyq úlgísín kórsetíp keledí. Árbír áıeldíń ómírge nár beretín, álemge jaryq syılaıtyn, joqtan bar jasaıtyn, típtí, jaulasqandy tatulastyryp, beıbítshílíkke shaqyratyn ǵajap qasıetí bar. Áıel tabıǵatynyń basty qūpıyasy men syry da – osynda.
"Áıel – ūlttyń jany" desek, artyq bolmaıdy. Ózderíńíz bergen tálím-tárbıe arqyly ūrpaqtyń dúnıetanymy qalyptasady, jastar ádeptílík, otanshyldyq, eńbekqorlyq, bílímpazdyq syndy asyl qasıetterdí boıyna síńíredí.
Ūly dalanyń qaısar qyzdary jaıly ańyzǵa bergísíz aqıqat áńgímeler ǵasyrdan ǵasyrǵa jalǵasyp keledí. Qazaq arularynyń parasattylyǵy men batyrlyǵy jūrtymyzdyń jadynda jattalyp, tarıhynda tańbalanyp qalǵan. Osy sabaqtastyq qazír de saqtalyp otyr. Kóptegen qyz-kelínshekter Otanymyzǵa qaltqysyz qyzmet etíp, mektepter men unıversıtetterde, emhanalar men zerthanalarda, memlekettík mekemeler men qoǵamdyq ūıymdarda, óner men bızneste, óndírís oryndary men sharuashylyqtarda, áskerı bólímshelerde jáne el ómíríníń basqa da salalarynda abyroıly eńbek etíp júr.
Qazaqstan halqymyzdyń keleshektegí taǵdyryna tíkeleı yqpal etetín auqymdy jańǵyru jolyna tústí. Jańa Halyq Konstıtutsıyasy jobasynyń ózegí – elímízdíń Táuelsízdígí, egemendígí, aumaqtyq tūtastyǵy, azamattardyń múddelerí men qūqyqtary.
Referendumǵa shyǵarylǵan jańa Ata zańnyń jobasynda ana men balany qorǵau, neke jáne otbasy ınstıtutyn kúsheıtu máseleleríne aıryqsha nazar audaryldy. Sondaı-aq halyqtyń ál-auqatyn arttyruǵa, qoǵamda zańdy qūrmetteu, tabıǵatty ayalau, ádíldík, eńbekqorlyq, jauapty jáne jasampaz otanshyldyq qaǵıdattaryn ornyqtyruǵa basa mán beríldí.
Áıelder qauymy bolashaqta da ózderíníń adaldyǵymen, qarym-qabíletímen, erekshe kúsh-jígerímen Ádílettí, Órkendegen Qazaqstandy qūruǵa belsene atsalysa beretíníne kámíl senemín.
Barshańyzǵa myqty densaulyq, baq-bereke, tolaǵaı tabys tíleımín" - dedí Prezıdent.
