Almaty polısıasy áıgili "Nur-Muqasan" tobynyń burynǵy jáne qazirgi solıserine qatysty janjalǵa pikir bildirdi, dep habarlaıdy Aqshamnews.kz tilshisi.
Buǵan deıin áleýmettik jelide toptyń qazirgi solısi Ǵalymjan Súleımendi burynǵy qatysýshy Muqasan Shahzadaev pen onyń tanystary uryp-soqqany týraly aqparat taraǵan. Zardap shegýshiniń aıtýynsha, oqıǵa 20 qarashada bolǵan. Janjal toptyń ánderin ruqsatsyz oryndaý daýyna baılanysty týyndaǵan.
Polısıa málimetinshe, 22 qarashada Naýryzbaı aýdanynyń polısıa basqarmasyna turǵynnan azamat M. jáne ózge de adamdar tarapynan dene jaraqatyn salý boıynsha shaǵym túsken. Atalǵan fakti boıynsha qylmystyq is qozǵaldy. Qazirgi tańda barlyq mán-jaı anyqtalyp, jan-jaqty jáne obektıvti tergeý júrgizilip jatyr. Tergeý qorytyndysy boıynsha zańǵa sáıkes sharalar qabyldanady.