Bıyl sáuírden bastap Qazaqstan kıík múıízín satudy qaıta bastauǵa nıettí, – dep habarlaıdy aqshamnews.kz tílshísí.
Ekologıya jáne tabıǵı resurstar mınıstrí Erlan Nysanbaev būl saudadan túsken qarajat qaıda jūmsalatynyn aıtty.
Ár múıízdíń esebí bar
Mınıstrdíń aıtuynsha, Almatydaǵy arnaıy qoımada shamamen 20 tonna kıík múıízí jınalǵan.
- Kıík sanyn retteu kezínde múıízder kesílíp alynady. Olar qabyldau punktterínde jáne jergílíktí ákímdíkterde aqparattyq júıege engízílíp, arnaıy tańbalanady. Keıín kúzetpen Almatyǵa jetkízíledí. Mūnda arnaıy salqyndatqysh qoımalar bar. Onda belgílí bír temperatura men ylǵaldylyq rejımí saqtalady. Ár múıízdíń jeke nómírí bar jáne bárí tírkeude tūr, – dedí Erlan Nysanbaev.
Aıta ketu kerek, kıík múıízí – brakonerlerdíń basty nysanasyna aınalǵan eń qūndy resurs. Osy saladaǵy tártíptí kúsheıtu úshín Qazaqstan Bonn konventsıyasyna qosylyp, 2016 jyldan berí kıík múıízín satuǵa nóldík kvota engízgen edí.
Kıíktí qorǵau úshín ata ma?
2025 jyldyń jeltoqsanynda būl kvota jylyna 10 tonnaǵa deıín ūlǵaıtyldy. Degenmen Ekologıya mınıstrlígí ázírge kıík múıízín satudan qansha qarjy túsetínín naqty aıta almaı otyr.
- Naryqta óním bolmasa, onyń baǵasy joǵary bolady. Al kóp kólemde shyqsa, baǵa tómendeuí múmkín. Sondyqtan naqty soma turaly aıtu qıyn, – dedí mınıstr.
Sonymen bírge, mınıstrlík túsken qarajattyń qaıda jūmsalatynyn anyqtap qoıǵan.
- Būl qarjy bıoaluantúrlílíktí saqtauǵa, kıíkterdí qorǵauǵa jáne qajettí tehnıka satyp aluǵa baǵyttalady, – dedí Nysanbaev.
Kıík múıízíníń baǵasy qansha?
Būǵan deıín Erlan Nysanbaev kıík múıízíníń baǵasyna qatysty píkír bíldíríp, ınternette bír kılogramy 2000 dollarǵa deıín satylatyny turaly málímetterdí kórgenín aıtqan. Alaıda mınıstr mūndaı baǵalar shynaıy emes boluy múmkín ekenín jetkízgen.