Keıíngí jyldary Dubaı baǵyty qazaqstandyq turıster úshín el íshíndegí qalalardyń bíríne baryp-keletín baǵyttardyń bíríndeı bolyp ketíp edí. Qazír Tayau Shyǵystaǵy qaqtyǵysqa baılanysty būl baǵytqa sapar múmkín emes.
Degenmen, jylyna bír ret shetelge shyǵudy ádetke aınaldyrǵan turısterge álemdegí tūraqsyz jaǵdaı tosqauyl emes. Saud Arabıyasy men BAÁ baru būıyrmasa, balama elderge saparlaryn auystyryp jatyr. Turoperatorlardyń basym bólígí qauípsíz baǵyt retínde Qytaı, Vetnam, Taıland, Indonezıya men Maldıv araldaryn ūsynady.
Sūranysqa ıe baǵyttar
Qazír turıstík agenttíkterden bólek, jekelegen adamdar da osy saladan nápáqasyn tauyp júr. Sondaı jandardyń bírí - Jadyra Boranbaeva. Tur jetekshísí qazír Tayau Shyǵys elderíne jol jabylǵanmen, basqa baǵyttarǵa sūranys arta túskenín aıtady. Aıtuynsha, osy jaqyn aralyqta Dubaıǵa baruǵa nıettí adamdar joq eken. Áskerı qaqtyǵysqa deıín saparǵa shyqqandar aman-esen sayahattap, elge oralyp úlgergen. Qazír sayahattaushylar arasynda kelesí baǵyttarǵa sūranys arta túsken.
Túrkıya - dástúrlí baǵyt. Nauryzda turıster Stambul men Kappadokıyany kóruge barady. Qazír suǵa túsíp, shomylatyn mausym bolmasa da, būl el tarıhı jáne mádenı ekskursıyalar úshín qolaıly.
Taıland - jyly teńízí men ekzotıkalyq demalys úshín tanymal. Almatydan Bangkokqa ūshu - 6,5 saǵat, Phuketke 7–7,5 saǵatqa sozylady. Bír aptaǵa arnalǵan tur (ūshu + tańǵy as qosylǵan 4 jūldyzdy qonaqúı) shamamen 1 mln teńge. Ádette būl baǵytty balasy joq otbasylar men jastar tańdaıdy.
Vetnam - sūranys artyp kele jatqan baǵyttardyń bírí. Eń tanymal kurorttar – Nyachang jáne Fukuok. Qonaqúılerde All Inclusive formaty damyǵan, jaǵajaılary ádemí, ekskursıyalyq baǵdarlamalary qyzyqty. Bír aptalyq tur baǵasy 2 adamǵa 4 jūldyzdy qonaqúıde 1,2 mln teńgeden, 5 jūldyzdy qonaqúıde 1,5 mln teńgeden bastalady. Sondaı-aq, Haınan aralyna bír aptalyq tur – 1 mln teńge.
Eskerte ketetín bír jaıt, tur ūıymdastyrushynyń aıtuynsha,qazír Mysyrǵa tíkeleı ūshu qauíptí. Sondyqtan sayahattaushylar Mysyrǵa Tayau Shyǵys aımaǵyn (Izraıl, Lıvan, Sırıya) aınalyp ūshu arqyly baryp jatqan kórínedí. Ol úshín Reseıdíń Sochı jáne Máskeu qalalarynan Hurgada nemese Sharm-el-Sheıh qalalaryna tíkeleı reıster bar. Būl reıster Qara teńíz ben Túrkıya aumaǵynyń ústínen ótedí.
Sonymen qatar, Stambul arqyly ūshaq auystyryp ūshuǵa nemese Europa qalalarynan shyǵys Jerorta teńízí baǵytyn aınalyp ótetín reıstermen jetuge de bolady.
Fors-major jáne aqshany qaıtaru
Eger memlekettík organdar resmı túrde ūshuǵa tyıym salsa, būl fors-majorlyq jaǵdaı dep esepteledí. Turıstík qyzmet zańyna sáıkes, turoperator turdy aıyppūlsyz toqtatuy kerek, al klıent qarajatty tolyq qaıtaryp ala alady.
Turoperatorlar aldyn ala tólengen qarajatty óz rezerví esebínen barynsha az shyǵynmen sheshuge tyrysady. Eger klıent balama ūsynysty qabyldamasa, aqsha 100% qaıtarylady.
Būl jerde eskerte ketetín jaıt, fors-major tek resmı tyıym salynǵan merzímderge qatysty. Mysaly, 1–15 nauryz aralyǵynda tyıym engízílse, sol kúnderge tur toqtatylady. Al aldaǵy aılarǵa josparlanǵan saparlarda standartty sharttar saqtalady, klıent óz erkímen turdan bas tartsa, aldyn ala tólengen aqshanyń bír bólígínen aıyryluy múmkín.
Umra sapary jáne qajylyq turızmí
Tayau shyǵystaǵy qaqtyǵys qasıettí Ramazanmen tūspa-tūs keldí. Bıyl qajylyq turızmí shamamen úsh esege artty. Ūshu slottary joıyldy nemese keıínge shegeríldí, bíraq turoperatorlar klıentterdí sapar kúnín keıínge qaldyruǵa kóndíríp otyr. Kópshílík qajylyq jasau nıetín saqtap otyr, tek merzímderí ózgergen.
Qazaqstan azamattaryn evakuatsıyalau (SÍM píkírí)
Qazaqstan Respublıkasynyń Syrtqy íster mınıstrlígí Tayau Shyǵys elderíndegí Qazaqstan azamattarynyń qauípsízdígín qamtamasyz etu úshín evakuatsıyalyq sharalardy júzege asyruda. Kúní keshe vedomstvonyń taratqan aqparatyna saı:
Evakuatsıya bastalǵaly berí 8 585 qazaqstandyq elge qaıtaryldy.
Aldaǵy kúnderí evakuatsıya josparlanǵan: Izraıl – 78 adam, Katar – 350, BAÁ – 550, Saud Arabıyasy – 300 adam. Būl sandar ózgeruí de múmkín.
Áue reısterínen bólek, azamattar jerústí joldary arqyly da elge jetkízílude (mysaly, Iran arqyly 66 adam).
Qazaqstannyń dıplomatıyalyq ókíldíkterí evakuatsıyany úılestírude jáne azamattarmen tūraqty baılanysta.
Mınıstrlík azamattardan resmı habarlamalardy únemí qadaǵalap otyrudy, qauíptí audandarǵa barmaudy jáne qauípsízdík sharalaryn saqtaudy sūraıdy. Azamattardyń qauípsíz elge oraluy – memleket úshín basymdyq bolyp qala beredí.
Tayau Shyǵystaǵy áskerı ís-qımyldar tolyq toqtaǵanǵa deıín Syrtqy íster mınıstrlígí el tūrǵyndaryna kelesí elderge barudan bas tartudy ūsynady:
Bahreın, Mysyr, Izraıl, Iemen, Iordanıya, Irak, Iran, Katar, Saud Arabıyasy, Kuveıt, Lıvan, BAÁ, Oman, Sırıya.
Sonymen qatar, QR SÍM osy elderde júrgen azamattardy jeke qauípsízdígín kúsheıtuge, qauíptí audandarǵa barmauǵa, jergílíktí bılík organdarynyń nūsqaularyn oryndauǵa, sonyń íshínde zymyrandar qaupí tuyndaǵan jaǵdaıda dereu panalau ornyna baruǵa keńes beredí. Odan bólek Qazaqstan elshílígímen, turoperatorlarymen tūraqty baılanysty boluǵa shaqyrady.
«Ūsynymdarǵa qaramastan jekelegen azamattar sol aımaqqa baruǵa árekettenude. Osyǵan baılanysty azamattardy jaǵdaı tolyq tūraqtalǵanǵa deıín mūndaı saparlardan bas tartuǵa shaqyramyz», – deıdí SÍM resmı ókílí Erlan Jetíbaev
Eske sala keteıík, Air Astana áue kompanıyasy Tayau Shyǵystaǵy shıeleníske baılanysty, Dubaıǵa ūshatyn reıster toqtatylǵanyn málímdegen edí.
Áspet DULATBEKOVA