Prezıdent Qasym-Jomart Toqaev ustazdardyń Respýblıkalyq tamyz konferensıasynda «Taza Qazaqstan» uǵymynyń mánin keńinen túsindirdi, dep habarlaıdy aqshamnews.kz
Memleket basshysynyń aıtýynsha, Taza Qazaqstan – qorshaǵan ortany taza ustaýmen ǵana shektelmeıdi. «Bul – eń aldymen oı-sana tazalyǵy. Jan-dúnıesi taza adam qaıyrymdy, meıirimdi bolady. Qoly taza adam jemqorlyqqa barmaıdy, adal bolady. Asyl qasıetterdi boıyna sińirgen naǵyz adal azamattar Ádiletti Qazaqstannyń tiregi bola alady», – dedi Prezıdent.
Bıyldan bastap elimizde «Adal azamat» atty birtutas tárbıe baǵdarlamasy iske qosylady. Baǵdarlama barlyq mektepterde, sonyń ishinde jekemenshik bilim oshaqtarynda da qoldanylady. Sondaı-aq, pedagog mamandar daıarlaıtyn joǵary oqý oryndaryna da engizý usynyldy.
Prezıdenttiń aıtýynsha, bilim men tárbıe – kez kelgen qoǵamnyń qos tuǵyry. Mektep tek bilim berip qana qoımaı, óskeleń urpaqqa durys jol kórsetetin rýhanı ortalyq bolýy tıis. Urpaq tárbıesinde «Otbasy – mektep – memleket» úshtigi úılesimdi jumys isteýi qajet.
«Jas urpaqqa eńbeksiz esh ıgilik bolmaıtynyn túsindirý – basty mindet. Qoǵamda masyldyqqa jol bermeý kerek. Taza Qazaqstan – osy ıdeıany júzege asyratyn qadamdardyń biri», – dep túıindedi Qasym-Jomart Toqaev.