Táuelsízdík – halqymyzdyń ǵasyrlar boıǵy armanyn aqıqatqa aınaldyrǵan tarıhı kezeń, derbes damudyń bastauy. Egemendíkke qol jetkízgen kúnnen bastap Qazaqstan óz damu jolyn álemdík órkenıet talaptaryna saı aıqyndap, jańa belesterdí baǵyndyryp keledí. Búgíngí jetístíkterímíz – eldíktíń, erkíndíktíń jáne ūlt bírlígíníń kórínísí.
El damuynyń ózegí – azamattardyń jauapkershílígí. Ásírese, jastar tárbıesí Qazaqstannyń bolashaǵy úshín sheshushí ról atqarady. Óskeleń ūrpaqtyń bílímdí, eńbekqor, sanaly boluy – memlekettíń ūzaq merzímdí órkendeuí men tūraqtylyǵyna bastaıtyn negízgí kúsh. Búgíngí jastarǵa berílgen erkíndík – óz Otanyn damytu múmkíndígí ǵana emes, úlken amanat.
Jastardyń otanshyldyq ruhyn tárbıeleu, eldíń tarıhyn qūrmetteu, memlekettík tíl men ūlttyq mádenıettí qadírleu – ūlttyń bolashaqtaǵy tūtastyǵynyń berík tíregí.
Qazaqstannyń jańa damu baǵyty – ádílettí qoǵam qūru, el ekonomıkasyn ártaraptandyru, tsıfrlandyrudy kúsheıtu jáne ınnovatsıyaǵa negízdelgen óndírístí damytu. Osy salalardyń bárínde jastardyń belsendílígí erekshe qajet. Sebebí el erteńín qūratyn – jańasha oılaıtyn, bastamashyl, bílímdí buyn.
Jahandyq ózgeríster dáuírínde Qazaqstan halyqaralyq arenada óz orny bar memleketke aınaldy. Beıbítshílík pen kelísímge negízdelgen sayasatymyz eldíń tūraqtylyǵyn arttyryp qana qoımaı, álemdík qauymdastyqta senímdí seríktes retíndegí bedelín kúsheıttí.
Ūlttyq mádenıet pen salt-dástúr táuelsízdík jyldary jańa serpín aldy. Tarıh astaryndaǵy qūndylyqtardy dárípteu, mádenı mūrany saqtau – ūrpaq sabaqtastyǵynyń basty kepílí. Patrıotızm – tek sóz emes, eldí súyudíń, jauapkershílík pen ískerlíktíń naqty áreketí. Árbír azamattyń Otan aldyndaǵy paryzy – tuǵan jerín qūrmettep, eldíń damuyna úles qosu.
Ekonomıkalyq tūrǵydan da elímíz jasyl energıya, óńdeu ónerkásíbí, auyl sharuashylyǵy men tsıfrlyq ınfraqūrylymdy damytuda jańa árí qarqyndy qadamdar jasauda. Būl – eldí básekege qabílettí etu jolyndaǵy naqty áreketter men jūmysshy mamandarǵa degen qoldau.
Táuelsízdík kúní – ótkenge taǵzym etíp, bolashaqqa úmítpen qaraudyń merekesí. Būl kún – eldíktíń, yntymaqtyń, ortaq qūndylyqtardyń saltanaty. Qazaqstannyń búgíngí tabysy – ár azamattyń eńbegí men bírlígíníń nátıjesí.
Bírlík, bílím, otanshyldyq, jastardyń belsendílígí – elímízdí jańa bıíkterge jeteleıtín eń basty qūndylyqtar.
Táuelsíz Qazaqstannyń tuy árqashan bıíkte jelbírep, ūrpaqtan-ūrpaqqa jalǵasatyn ūlttyq ruhymyz máńgílík bolsyn!
Prıntmedıa tehnologıyalar kolledjí dırektorynyń tárbıe ísí jóníndegí orynbasary,
Almaty qalasy Íshkí sayasat basqarmasy Qoǵamdyq damu ortalyǵynyń Sarapshylar Pulynyń múshesí –
Kúntubaı Aıdar Seríkūly
