Aqparat zamanynda tanymal jandardyń tolqyny mezgíl-mezgíl almasyp otyrady. Bír kúnde jelí jūldyzyna aınalyp, kóptíń sūranysyna ıe bolǵandar uaqyt óte nazardan tys qalyp, kópshílík kóleńkesínde qalyp jatyr. Otandyq medıa men shou-bıznestíń tasada qalǵan tanymaldary qazír qaıda júr? Aqshamnews.kz tílshísí ízdep kórdí.
Bala Jambyldan - aǵa Jambylǵa
Nebárí 4 jasynan jyr jazyp, 7 jasynda jyr keshín jasap, eldí auzyna qaratqan aqyn bala esteríńízde me? Taudaı talabymen talaıdy tańǵaldyrǵan Jambyl Dúısenūly zerektígíníń arqasynda túrlí baıqaularda top jaryp, osydan 10 jyl būryn el auzynan túspegen edí. Alaıda keıíngí jyldary kóp arasynan kórínbeı kettí.
Jūrt íshínde "Bala Jambyl" atymen tanylǵan jas aqyn qazír Almatyda magıstratura oqyp jatyr eken. Būl turaly bízge Jambyldyń anasy áńgímelep berdí.
"Balam tayauda bílím jolynda AQSh-qa saparlap keldí. Qazír ál-Farabı atyndaǵy QazŪU-de magıstraturada bílím alyp jatyr. Uaqyty tym az. Ashyq sūhbatqa, kópshílík aldyna shyqpaı júrgení sodan bolar. Balam turaly ár túrlí jelíde píkírler esíp jatyr ǵoı. Maǵan ūlymnyń amandyǵynan basqa eshteńe kerek emes. Jambyl óleńín de, ónerín de tastaǵan joq" deıdí Jambyl Dúısenūlynyń anasy Kámshat hanym.
Aǵaıyndy Júgínísovter qaıda júr?
Júgínísovter dese bírden "Astana" ání eske túsedí. Nege deseńízder, "Aǵaıyndy Júgínísovter" ūqsastyqtarymen, erekshe harızmalarymen, jan-jaqty ónerímen jūrt jadynda qalǵan edí. Shamamen 10 jyl būryn sahna tórínen túspegen Júgínísovter otbasy qazír túrlí salany tízgíndegen.
Aǵaıyndylardyń úlkení - Rústem Júgínísov otbasyly bolyp, dín jolyna bet būryp, jeke kásíp bastaǵan. Keıíngí jyldary jelíde dínı kontent júrgízíp, án álemínen múlde alystap kettí. Ol sahnaǵa 2020 jyly "Sen maǵan kereksíń" degen jeke ánímen shyqqan edí.
Al aǵaıyndylardyń ortanshysy - Mıras Júgínísov kerísínshe qazír sūranystaǵy hıtmeıkerge aınaldy. Myńdaǵan tyńdarmandar jınap, Qazaqstannyń túkpír-túkípírínde írí kontsertter ótkízíp júr.
Júgínísovterdíń kenjesí - Mūhammedálı erte úıleníp, jelíní bír shulatqan edí. Qazír ol da jeke shyǵarmashylyǵyna kóńíl bólíp, ánder shyǵaryp júr. Keıíngí ret ony "Qazaqstan dauysy" jobasynan kórgen bolatynbyz.
Sanjar men Qaısar keıípkerlerí nege kórínbeı kettí?
Keıíngí buyn teledıdardan Sanjar men Qaısar serıalyn kóríp óskení sózsíz. 13 jyl būryn "Balapan" arnasynyń kórermenderíne jol tartqan teletuyndy talaılardyń kóńílínen oıyp tūryp, oryn alǵan edí. 2 mausymnan tūratyn balalar serıalynyń akterlerí de óz sheberlíkterímen, ónerímen talaıdy tamsantqan bolatyn.
Qaısardyń rólínde - akter Nūrdáulet Esbolǵan oınady. Ol Tık-Tok jelísínde túrlí vıdeolar túsíríp, el aldyna shyǵyp júretín. Keıíngí kezderí jelíde ápkesíníń emíne kómek sūrap, jūrt nazaryna jıí túspeıtín boldy.
Al oqymysty bala Sanjardyń rólínde - Abylaı Jūmabaı oınady. "Kíshkentaı Sanjar" búgín úlken jígít bolǵan. Abylaı da óner jolyn quyp, T.Júrgenov atyndaǵy óner akademıyasyn támamdady. Ol keıíngí ret "Bír toqsan" serıalynyń bírneshe mausymynda tóbe kórsetken edí. Ázírge ózge medıa jobalardan kórínbeı júr.
Shal men Shaıtanbek qaıda?
2012 jyly úlken ekranǵa shyǵyp, kóptíń kóńílínen shyqqan "Shal" fılmín bílmeıtín qazaq joq shyǵar. Būl tuyndy - áıgílí amerıkalyq jazushy Ernest Hemıngueıdíń "Shal men teńíz" hıkayasy jelísímen túsírílgen qazaqsha nūsqa bolatyn.
Erekshe atmosferasy men tereń fılosofıyalyq mánímen este qalǵan "Shal" - qazaq kınosy tarıhyndaǵy shoqtyǵy bıík tuyndylardyń bírí. Alaıda fılmnen keıín basty róldí somdaǵan akterlerdíń shyǵarmashylyq joly kópshílík nazarynan tys qalyp qoıdy.
Basty róldegí Shaldy somdaǵan Erbolat Toǵyzaqov ízdegen jan úshín óner álemínen alystamaǵan. Búgínde ol bírneshe kınotuyndylarǵa túsíp júr. Aqshamnews.kz tílshísí akterdí otandyq medıa keńístíkterdíń bírínde kezdestíríp qalyp, qazír qaıda júrgenín sūrady. Ol ózíníń eshqaıda joǵalyp ketpegenín aıtty.
"Shaldan" keıín jarq etken rólím bálkím bolmaǵan shyǵar. Kóbí mení kórínbeı kettí dep júr. Bíraq olaı emes. Shaqyrtu alǵan otandyq fılmderde oınap júrmín. Ízdegender úshín júrmín ǵoı" dedí akter.
Shaldyń nemeresín somdaǵan Shaıtanbek qaıda? Atasyna qarsy shyǵyp, eshteńege kóńílí tolmaıtyn "Shaıtanbek" búgínde otbasyly, el aǵasy boldy. Fılmde nemeresí Eralyny oınaıtyn akter Orynbek Moldahan qazír Almatydaǵy "Asyl qazyna" qoǵamdyq qorynyń basshysy bolyp, memlekettík qyzmette júr.
