Almatyda Baluan Sholaq atyndaǵy sport jáne mádenıet keshenínde qaıtalama shıkízat pen qauíptí qaldyq jınauǵa arnalǵan ekologıyalyq aktsıya óttí. Onyń basty maqsaty – plastık bótelkení ótkízu nemese bír zatty qaıta paıdalanuǵa beru sıyaqty kúndelíktí qarapaıym áreketterdíń ózí úlken ekologıyalyq ózgerísterge úles qosa alatynyn kórsetu, – dep habarlaıdy aqshamnews.kz tílshísí.
Ís-sharaǵa Recycle Birge ekologıyalyq qozǵalysynyń (Greenup.kz QQ), seríktes ūıymdary jáne qalalyq qyzmetter qatysty. Nauqan jūmysyna «Eco Almaty» JShS de qatysyp, jınalǵan qaldyqtardyń jekelegen túrín qabyldap, olardy qauípsíz kádege jaratu men qaıta óńdeuge jíberudí qamtamasyz ettí.
Aktsıya ayasynda qala tūrǵyndary qaıtalama shıkízattyń 17-den astam túrín tapsyrdy. Olardyń qatarynda plastık, makulatura, shyny, metall bankíler, penoplast, sondaı-aq kúrdelí árí sırek kezdesetín qaldyq túrlerí — elektrondyq tehnıka, synap qūramdy qaldyqtar jáne merzímí ótken dárílík zattar bar. Jınalǵan qauíptí qaldyqtardyń barlyǵy qauípsízdík talaptaryn saqtaı otyryp qabyldanyp, arnaıy qaıta óńdeuge jíberíldí.
Nauqannyń jeke baǵyttarynyń bírí synap qūramdy shamdardy jınau boldy. Jalpy almatylyqtar 1543 paıdalanylǵan sham tapsyrdy. Olar qauípsíz kádege jaratu úshín arnaıy óńdeuge joldandy. Mamandardyń aıtuynsha, mūndaı qaldyqtar erekshe saqtyqpen óńdeluge tıís, óıtkení olardyń qūramynda synap bar jáne dūrys paıdalanylmaǵan jaǵdaıda qorshaǵan ortaǵa zıyan keltíruí múmkín.
Sondaı-aq, zattardy qaıta paıdalanuǵa da erekshe nazar audaryldy. Qala tūrǵyndary qaıyrymdylyq ūıymdaryna beru úshín kıím-keshek, ayaq kıím, kítaptar men tūrmystyq zattardy ákeldí. Alańda kítap almasu, bólme ósímdíkterímen almasu aımaqtary jáne «Darmarka» ūıymdastyryldy. Mūnda qatysushylar qajetsíz zattaryn tegín beríp, ózderíne kerek dúnıení alu múmkíndígíne ıe boldy.
Ūıymdastyrushylardyń aıtuynsha, mūndaı formattaǵy ekologıyalyq aktsıyalarǵa qala tūrǵyndarynyń qyzyǵushylyǵy jyl saıyn artyp keledí. Būǵan deıín ótken ís-sharalarda bírneshe saǵattyń íshínde ekí tonnadan astam qaıtalama shıkízat pen qaıta paıdalanuǵa bolatyn zattar jınalǵan. Ár jańa aktsıya saıyn qatysushylar sany da, tūrǵyndardyń ekologıya men jauapty tūtynu máseleleríne degen qyzyǵushylyǵy da kóbeıíp keledí.
Recycle Birge ekologıyalyq qozǵalysy Almatyda osyndaı aktsıyalardy 2019 jyldan berí ótkízíp keledí. Būl bastamalar qaldyqtardy bólek jınau mádenıetín qalyptastyruǵa jáne tabıǵatqa jauapkershílíkpen qarauǵa daıyn azamattardyń belsendí qauymdastyǵyn damytuǵa yqpal etude. Tek 2025 jyldyń ózínde qozǵalys komandasy toǵyz írí ekologıyalyq ís-shara ūıymdastyryp, olardyń árqaısysyna júzdegen, típtí myńdaǵan adam qatysty.
