Atys kezinde 13 adam qaza tapqany habarlandy
«Talıban» sodyrlary toı kezinde mýzyka oınaǵany úshin oq atty. Bul týraly Afghan Voice Agency agenttigi habarlady, dep jazdy Baq.kz.
Aýǵanstannyń burynǵy vıse-prezıdenti Amrýlla Saleh el bıligin basyp alǵan «Talıban» radıkaldy qozǵalysynyń sodyrlary Nangarhar provınsıasynda toı ústinde 13 adamdy atyp tastady dep aıyptady.
«Talıban» sodyrlary Nangarharada ótip jatqan toıda mýzykanyń únin óshirý úshin 13 adamdy atyp tastady. Biz ashýymyzdy qur aıyptaýmen jetkize almaımyz. Bul rejım kópke barmaıdy, ókinishke qaraı ol kúıregenge deıin aýǵan halqy odan zardap shegedi»,-dep jazdy ol Twitter-degi paraqshasynda.
Sonymen qatar ol Pákistan bıligin tálipterge kómektesip otyr dep taǵy aıyptady.
Afghan Voice Agency agenttiginiń málimetinshe, atalǵan jaǵdaı juma kúni keshke Sýrhrýd ýezinde bolǵan. «Talıban» sodyrlary toı kezinde mýzyka oınap turǵandyqtan oq atqan. Agenttiktiń derekkózi bergen málimet boıynsha, atys kezinde eki adam qaza taýyp, on shaqtysy jaraqat alǵan.
Óz kezeginde «Talıban» ókili, ýaqytsha aýǵan bıliginiń Aqparat jáne mádenıet mınıstriniń orynbasary Zabıhýlla Mýdjahıd Twitter-degi paraqshasyna atalǵan jaǵdaıǵa qatysty túsinik berdi.
«Ózderin «Talıban» ókili retinde tanystyrǵan úsh adam toıdaǵy mýzykany toqtatý jóninde eskertý jasaǵan, keıin olarǵa oq atqan. Sonyń saldarynan úsh adam qaza taýyp, birneshe jergilikti turǵyn jaralanǵan. Qylmys jasady degen eki kúdikti ustaldy, olar sharıǵat zańy boıynsha jazalanady»,-dep jazdy Mýdjahıd.