Almaty qalasyndaǵy Qazaqstan Respublıkasynyń Ūlttyq kítaphanasynda memleket jáne qoǵam qaıratkerí, tehnıka ǵylymdarynyń doktory, professor, QR Ūlttyq ınjenerlík akademıyasynyń Prezıdentí, akademık Baqytjan Tūrsynūly Jūmaǵūlovtyń «Taıtalas taǵdyr» atty kítabynyń tūsaukeser rásímí óttí. Ís-sharany Ūlttyq ınjenerlík akademıyasy ūıymdastyryp, oǵan ǵylymı qauymdastyq ókílderí, zıyaly qauym, memlekettík organdar men joǵary oqu oryndarynyń basshylary qatysty.
Tūsaukeserdí Qazaqstan Respublıkasynyń Memlekettík syılyǵynyń laureaty, aqyn Nūrlan Orazalın júrgízíp, eńbektíń mazmūndyq tereńdígí men qoǵam úshín ózektílígín atap óttí. QR Parlamentí Senatynyń Tóraǵasy Máulen Áshímbaevtyń qūttyqtauyn Senat deputaty Nūrtóre Júsíp oqyp berdí. QR Ǵylym jáne joǵary bílím mınıstrí Sayasat Nūrbektíń qūttyqtauyn vıtse-mınıstr Talǵat Eshenqūlov jetkízdí. Sondaı-aq Ūlttyq ǵylym akademıyasynyń prezıdentí, akademık Aqylbek Kúríshbaev ǵylymı qauymdastyq atynan jyly lebízín bíldírdí.
«Taıtalas taǵdyr» kítabynda avtor táuelsíz Qazaqstannyń qalyptasu kezeńderínde oryn alǵan mańyzdy sheshímder men tarıhı oqıǵalardy óz kózqarasy men ómírlík tájírıbesí arqyly bayandaıdy. Memlekettík basqarudaǵy qıyn da jauapty kezeńder, el damuyna yqpal etken reformalar, qoǵamnyń ózgeru baǵyttary kítaptyń negízgí arqauyna aınalǵan. Sonymen qatar, avtor ár jyldary bírge qyzmet etken kórnektí tūlǵalar turaly estelíkterímen bólísíp, olardyń eldík múdde jolyndaǵy eńbegíne toqtalady. Eńbekte qazaq ǵylymynyń, ınjenerlík oıdyń, bílím beru salasynyń bolashaǵy men ūlttyq qūndylyqtardy damytu máselelerí jan-jaqty taldanady.
Ís-shara barysynda sóz alǵan qatysushylar būl kítaptyń jas ūrpaqqa, memlekettík qyzmetkerlerge, zertteushílerge jáne ınjenerlík-tehnıkalyq sala mamandaryna úlken ruhanı jáne zıyatkerlík azyq bolatynyn atap óttí. Tuyndy el tarıhynyń mańyzdy kezeńderín óz kózímen kórgen árí sol úderísterdíń bel ortasynda júrgen tūlǵanyń tereń oı tolǵamdaryn qamtıtyn qūndy eńbek retínde baǵalandy. Kítapta ūsynylǵan taldaular men paıymdar qazírgí Qazaqstannyń damu barysyn jańa qyrynan túsínuge múmkíndík beretíní aıtyldy.
Qazaqstan Respublıkasy Ūlttyq ınjenerlík akademıyasy «Taıtalas taǵdyr» kítabynyń jaryq kóruín ūlttyq ǵylymı jáne ınjenerlík qauymdastyq úshín mańyzdy oqıǵa dep esepteıdí. Būl eńbek elímízdíń zıyatkerlík mūrasynyń bír bólígí retínde ǵylymı ortanyń da, qoǵamnyń da nazarynda bolady dep sením bíldíredí. Akademıya tūsaukeserge qatysqan barlyq qonaqtarǵa alǵys bíldíre otyryp, kítaptyń keń taralyp, jas buynǵa baǵyt-baǵdar bolatyn qūndy dúnıe retínde qyzmet etetíníne sením artady.