Búgín Qazaqstan Halyq jazushysy, Qazaq KSR Memlekettík syılyǵynyń laureaty Tūmanbaı Moldaǵalıevtíń tuǵanyna 90 jyl toldy, dep habarlaıdy aqshamnews.kz
Tūmanbaı Moldaǵalıev 1935 jyly 20 nauryzda Almaty oblysy, Eńbekshíqazaq audany, «Jarsu» sovhozynda tuǵan. 2011 jyly 10 qazanda dúnıeden ozdy.
Ol jyly Qazaq memlekettík unıversıtetíníń fılologıya fakultetín bítírgen. Ózíníń shyǵarmashylyq eńbek jolyn «Lenınshíl jas» gazetí men «Pıoner» jurnalynan bastady. 1959-1970 jyldar aralyǵynda «Pıoner» jurnalynda qyzmet atqardy. 1970-1973 jyldar aralyǵynda «Baldyrǵan» jurnalynyń jauapty hatshysy boldy. 1973 jyldan «Jazushy» baspasy janyndaǵy Balalar jáne jastar ádebıetíníń bas redaktsıyasy men «Jalyn» jurnalynyń bas redaktory bolyp qyzmet ístedí.
Alǵashqy óleńder jınaǵy «Student dápterí» 1957 jyly jaryq kórdí. T. Moldaǵalıev názík syrly, oıly da otty jyrlarmen tanyldy. «Kámıla» (1960), «Kóktem tańy» (1961) , «Alatau qyzy» (1963), «Feryuza turaly jyr» (1964), «Zulaıdy kúnder» (1965), «Júregím meníń saparda» (1966), t. b. jınaqtary shyqty. 1967 jyly jaryq kórgen «Jańa dápter» atty kítaby úshín 1968 jyly Qazaqstan Komsomoly syılyǵynyń laureaty atandy. «Eskertkísh» (1969), «Shaqyrady jaz mení» (1970), «Júrek oyau qashanda» (1972) atty kítaptary da oqushylardyń íltıpatyna bólendí. Onyń «Qosh, kóktem» atty tańdamaly óleńder kítaby (1971), «Hattar» atty poemalar jınaǵy (1974) jaryq kórdí. T.Moldaǵalıevtíń orys tílínde «Ya - syn Semırechya» (1962), «Pervaya vstrecha» (1968), «Novaya tetrad» (1969) atty óleń jınaqtary shyqqan.
Tūmanbaı Moldaǵalıevtyń jalpy 500 óleńíne ánder jazylǵan. Onyń «Qūstar qaıtyp barady» (muzykasy N. Tílendıevtíkí), «Baqyt qūshaǵynda», «Áním sen edíń» (muzykasy Sh.Qaldayaqovtíkí), «Ertís valsí» (muzykasy B. Jamaqaevtíkí), «Shaqyrady kóktem» (muz. Á.Beıseuovtíkí) atty ánge jazylǵan óleńderí halyq arasyna keń taraǵan. Ol Baıron, M. Lermontov, T. Shevchenko, O.Tumanyan, S.Kaputıkyan, Ǵ. Ǵūlam, R. Ǵamzatov jáne basqa da aqyndardyń shyǵarmalaryn qazaq tílíne audardy.
Aqynnyń 1990 jyly 13 tomdyq shyǵarmalar jınaǵy, 2004 jyly 14 tomdyq shyǵarmalar jınaǵy jaryq kórdí.
1992 jyly Fızulı atyndaǵy Halyqaralyq túrkí dúnıesí aqyndary syılyǵy tapsyryldy.
