Taldyqorǵan qalasynda shaǵyn futboldan dástúrlí turnır óttí.
Sporttyq shara Sarqan audanyna qarasty Qarabóget auylynyń 1980 jyly tuǵan azamattarynyń bastamasymen ūıymdastyrylyp, marqūm bolǵan auyldastardyń ruhyna arnaldy.
Turnırdíń basty maqsaty – ómírden ozǵan azamattardy eske alyp, auyldastar arasyndaǵy dostyqty, bírlíktí nyǵaıtu, úlkenge qūrmet, kíshíge ízet kórsetu jáne jastardy salauatty ómír saltyna baulu.
Būl jolǵy jarys marqūm bolǵan azamattar – Áıtenov Ádíl Dúısetaıūly, Nūrǵalıev Aıdynbek Baıǵalıūly, Bajaev Almat Maratūly, Kırısbekov Dulat Qojahmetūly jáne Bólegenov Regıstan Maratūlynyń jarqyn beınesíne arnaldy.
«Búgíngí turnır joǵary deńgeıde óttí. Bírlíktíń arqasynda jastarymyz būqaralyq sportqa den qoıyp keledí. Sonymen qatar dúnıeden ozǵan joldastaryn eske alyp, as beríp, sauapty ís jasap otyr. Būl ıgí bastama aldaǵy uaqytta da jalǵasyn tabady dep senemín», – dedí Qarabóget auylynyń tumasy, marqūm Regıstan Bólegenovtíń ákesí Marat Bólegenūly.
Bıyl úshínshí márte ūıymdastyrylǵan turnırge 11 komanda qatysty. Júldelí oryndar kelesídeı úlestíríldí: I oryn – 2001 jylǵy túlekter (100 000 teńge), II oryn – 1980 jylǵy túlekter (70 000 teńge), III oryn – 1988 jylǵy túlekter (50 000 teńge), IV oryn – yntalandyru syılyǵy. Sonymen qatar úzdík oıynshylarǵa arnaıy kuboktar, medaldar, madaqtamalar jáne qarjylaı syılyqtar tabystaldy.
«Turnırden alǵan áserímdí sózben jetkízu qıyn. Osyndaı sharalar bízdí jaqyndastyryp, ūmyt bola bastaǵan dostyqty qaıta jandandyrady. Būl – naǵyz bírlík pen jerlestík ruhynyń kórínísí», – dedí oıynǵa qatysushy Nūrlan Qabdoldın.
Al «1988» komandasynyń múshesí Nūrbol Beríkbolūly óz oıyn bylaı jetkízdí: «Ár oıyn sátínde tek futbol emes, shynaıy dostyq pen ózara qoldaudy sezíndík. Osyndaı kezdesuler kúndelíktí tírshílíkte alystap ketken bauyrlardy qaıta tabystyryp, ūrpaqtar sabaqtastyǵyn kúsheıtedí».
Turnır barysynda Qūran baǵyshtalyp, marqūm azamattardyń ruhyna as beríldí. Būl ıgí shara eldík pen erlíkke, dostyq pen qūrmetke bastaıtyn ízgí dástúrge aınaldy.
