2026 jyly 26 mausym kúní saǵat 14:00-de Qytaı Halyq Respublıkasynyń Shanhaı tarıhı muzeıínde (Shanghai History Museum) Almaty qalasy muzeıler bírlestígíníń «Dástúr sabaqtastyǵy: ata-baba mūrasy» atty halyqaralyq kórmesí saltanatty túrde ashylady, – dep habarlaıdy aqshamnews.kz tílshísí.
Ís-shara Almaty qalasy ákímdígíníń, Qazaqstan Respublıkasynyń Shanhaı qalasyndaǵy Bas konsuldyǵy jáne Shanhaı qalasy meríníń qoldauymen ūıymdastyrylyp otyr.
«Dástúr sabaqtastyǵy: ata-baba mūrasy» halyqaralyq kórmesíníń josparǵa engízíluíne Almaty men Shanhaı qalalary arasyndaǵy bauyrlastyq qatynastardyń ornatyluy («Qytaı – Ortalyq Azıya» ekínshí sammıtí, Astana qalasy, 2025 jylǵy 16-18 mausym) negíz boldy.
Sondaı-aq, 2026 jylǵy 7-8 sáuír aralyǵynda Shanhaı qalasynyń merí Gun Chjen Almatyǵa resmı ís-saparmen kelíp, qala ákímí Darhan Satybaldymen kezdesuí barysynda ekí megapolıs arasyndaǵy strategıyalyq áríptestíktí damytu jáne ózara yntymaqtastyqty keńeıtu máselelerí keńínen talqylanǵan bolatyn.
Almaty qalasy muzeıler bírlestígí men Shanhaı tarıhı muzeıí arasyndaǵy bauyrlastyq qarym-qatynastyń jalǵasy retínde yntymaqtastyq turaly memorandumǵa qol qoıylyp, onyń ayasynda Almaty muzeıíníń kórmesín Shanhaı tarıhı muzeıínde ūıymdastyru turaly sheshím qabyldandy.
Shanhaı tarıhı muzeıí (Shanghai History Museum) – Shanhaıdyń tarıhı ortalyǵynda ornalasqan memlekettík muzeı. Muzeı qorynda qalanyń 6000 jyldyq tarıhyn qamtıtyn ejelgí dáuírden XX ǵasyrdyń ortasyna deıíngí 30 000-nan astam tarıhı jádíger saqtalǵan.
Kórmeníń negízgí maqsaty – Qazaqstan men Qytaı Halyq Respublıkasy arasyndaǵy mádenı baılanysty nyǵaıtu, sondaı-aq qazaq halqynyń baı mádenıetí men tarıhyn tanystyru, ruhanı jáne materıaldyq mūrany saqtau men dárípteuge yqpal etu.
Kórmede Almaty qalasy muzeıler bírlestígí qorynan 100-ge juyq jádíger qoıylady. Olardyń qatarynda qazaq halqynyń etnografıyalyq mūrasyn, tūrmys-salty men dástúrín tanytatyn qūndy jádígerler, Almaty qalasynyń tarıhy men qazírgí ómírín beıneleıtín fotosuretter jáne halqymyzdyń ūlttyq muzykalyq mádenıetín dárípteıtín dástúrlí muzykalyq aspaptar bar.
Almaty qalasy muzeıler bírlestígí – elímízdíń mádenı jáne qoǵamdyq ómíríne belsendí úles qosyp kele jatqan zamanauı mádenı mekeme. Sońǵy jyldary bírlestík halyqaralyq seríktestík baǵytynda aıtarlyqtaı tabysqa qol jetkízdí.
Muzeı qorlaryndaǵy erekshe toptamalar būǵan deıín Ońtústík Koreya (Seul), Avstrıya (Vena), Frantsıya (Parıj), Italıya (Neapol), Chehıya (Praga), Serbıya (Belgrad), Majarstan (Kartsag), Túrkıya (Ystanbūl), Nıderland Koroldígí (Amsterdam) qalalarynda sáttí tanystyryldy.
«Dástúr sabaqtastyǵy: ata-baba mūrasy» kórmesí Ūly dalanyń mádenı mūrasyn álemge tanytyp, qazaq halqynyń ruhanı dúnıesí men tereń tarıhı tamyryn aıshyqtaıtyn mańyzdy mádenı oqıǵa bolmaq.
Kórme 2026 jyly 30 tamyzǵa deıín jalǵasady.
Saıt: https://almatymuseums.kz/
Instagram: @almatymuseums
Baılanys telefony: +7 708 820 6179; +7 747 934 94 59