CentralMedia24kz jańalyq portalynyń jurnalısí árí SMM-bólímíníń jetekshísí Ilya Roldugın sportpen sán men densaulyqqa bola aınalysyp júrmegenín aıtady. Sport — tártípke baulyp, kúızelíske tótep beruge kómektesíp, adamnyń kóńílín aulaıdy. Ilyanyń ózí osy jasqa deıín taı boksy men bıatlonnan bastap, bíraz salanyń basyn qaıyrypty. Almatylyqtardy da qysta tauǵa shyǵyp, shańǵy tebuge shaqyrdy osy joly.
«Bala kezímnen qozǵalysty jaqsy kóretín adammyn. Sporttyń qaı túríne bolsyn qyzyqtym», — deıdí Ilya.
Bíraz uaqyt boıy taı boksymen áuestenedí. Ol mínezín ornyqtyryp, jan-jaqty oılaudy úıretíptí.
Uaqyt óte kele syrttaı tynysh kórínetín, bíraq íshkí talaptary kem túspeıtín jańa nársení baıqap kórgísí keledí.
«Myltyq atuǵa qyzyǵatynmyn, júgírgen asa ūnamaıtyn. Sóıtíp bír kúní shańǵy teuíp kóríp, kútpegen jerden bıatlonǵa jol ashtym», — dep eske alady Ilya. Būl sport túrí oǵan tózímdílík, zeıín men íshkí tepe-teńdíktí qalyptastyruǵa kómektesken.
Shańǵy men bıatlon Ilyanyń ómíríne bíraz ózgerís alyp keledí.
«Shańǵy - íshkí tynyshtyq, tózímdílík sıyaqty būryn jetíspegen nárselerdí syılady», — deıdí. 2012 jyly Ilya jarysta ekínshí oryn alyp, ol ómíríne úlken betbūrys ákeledí. «Bıatlon - kúshtí eseppen jūmsap, salqynqandy boludy, atqan kezde de dál tıgízíp, asyǵystyq jasamaudy úırettí»,- dep eske aldy.
Būlar bylaıǵy ómírde de kádege jarady. 2017 jyldyń mamyrynan 2018 jyldyń mamyryna deıín Ilya shekara áskerínde qyzmet atqardy. Áskerde ol Ūlttyq qauípsízdík komıtetí tóraǵasynyń medalímen marapattaldy. Odan keıín de sportty tastamaı, IPSC praktıkalyq atysy formatyna auysady.
Ilya qazír sportty íshkí tírek dep qabyldaıdy.
«Men úshín sport tánníń kúshtílígí ǵana emes. Būl — energıya, taza oı men íshkí tártíp. Ol kúndelíktí ómírdíń artyq shuyn azaıtyp, eń kerek nársege ǵana kóńíl bóluge kómektesíp, adamdy sabyrly árí myqty etedí», — dep kórgín-túıgenín aıtty.
Almatylyqtardy da shańǵy tebuge shaqyrdy. «Úıde jata bergenshe bír ret baıqap kórseńíz, ómír boıy qar keshíp, shańǵynyń tayaǵyn qolyńyzdan tastamaı ketuíńíz múmkín. Sport – ómíríńízdí bastan-ayaq ózgertíp, táníńdí de, janyńdy da shynyqtyrady»,- deıdí ony óz basynan ótkergen Ilya Roldugın.