Májílís deputaty Nartaı Sársenǵalıev Parlament otyrysynda sóılegen sózínde Qazaqstanda ūsynylyp otyrǵan jańa Konstıtutsıyanyń mańyzyna toqtalyp, onyń halyqtyq talqylaudan ótken qūjat ekenín atap óttí. Deputattyń aıtuynsha, jańa Ata zań – eldegí sayası jańǵyrudyń logıkalyq jalǵasy jáne memlekettík basqarudy, adam kapıtaly men ūlttyq qauípsízdíktí kúsheıtetín mańyzdy qadam, – dep habarlaıdy aqshamnews.kz tílshísí.
Májílís mínberínde sóılegen deputat Nartaı Sársenǵalıev jańa Konstıtutsıyanyń qabyldanu úderísíne keń kólemde talqylau júrgízílgenín aıtty. Onyń sózínshe, qūjatty daıyndauǵa ár salanyń 130 mamany qatysqan. Al zańgerler men qoǵam belsendíleríníń ūsynystaryn qosa eseptegende, būl jūmysqa myńǵa juyq adam atsalysqan.
Deputat būl jaǵdaıdy būrynǵy Konstıtutsıyamen salystyryp óttí. Onyń aıtuynsha, būrynǵy Ata zańdy nebárí 12 adam jazǵan, onyń úsheuí sheteldík bolǵan. Sondyqtan jańa Konstıtutsıyanyń halyqtyq sıpaty áldeqaıda aıqyn ekenín atap óttí.
Nartaı Sársenǵalıevtíń píkírínshe, jańa Konstıtutsıya – memleket basshysy Qasym-Jomart Toqaev bastaǵan sayası reformalardyń zańdy jalǵasy. Qūjatta ádílettí Qazaqstan qaǵıdaty, zań ústemdígí, adam qūqyqtaryn qorǵau jáne memlekettík ınstıtuttardy jańǵyrtu sıyaqty mańyzdy baǵyttar qamtylǵan.
Deputat jańa Konstıtutsıyany túsíndíru maqsatynda halyqpen keń kólemde kezdesuler ótkenín de aıtty. Ózíníń aıtuynsha, ol «AMANAT» partıyasynyń «Halyq sózí» jobasy ayasynda arnaıy avtobuspen eldíń barlyq óńírín aralap, tūrǵyndarmen júzdesken. 17 oblys pen respublıkalyq mańyzy bar úsh qalany qamtyǵan sapar barysynda jańa Ata zańǵa qatysty ūsynystar men píkírler jınalǵan.
Sóz barysynda deputat jańa Konstıtutsıyadaǵy bírqatar mańyzdy ózgerísterge toqtaldy. Sonyń bírí – adam kapıtalyna basymdyq beru. Jańa redaktsıyada memleket bílím, ǵylym jáne ınnovatsıyany strategıyalyq baǵyt retínde tanıtyny naqty jazylǵan. Būl, deputattyń aıtuynsha, ǵylym men daryndy jastardy qoldauǵa jańa serpín beredí.
Sonymen qatar jańa Konstıtutsıyada qos azamattyqqa qatań tyıym salu normasy naqty árí túsíníktí túrde bekítílgen. Būl talap ūlttyq qauípsízdík pen sayası tūraqtylyqty qamtamasyz etuge baǵyttalǵan.
Taǵy bír mańyzdy ózgerís – Parlamenttíń rólín kúsheıtu. Būryn bolǵan prezıdenttík kvota normasy jańa Konstıtutsıyada alyp tastalǵan. Būl qadam yqpaldy Parlament qaǵıdatyn nyǵaıtuǵa baǵyttalǵan.
Deputat sondaı-aq teńgení ūlttyq valyuta retínde Konstıtutsıyada bekítu ūsynysyna da toqtaldy. Onyń aıtuynsha, būl norma ūlttyq ekonomıkanyń tūraqtylyǵy men memlekettík egemendíktíń mańyzdy belgísí bolyp sanalady.
Būdan bólek, Ata zańǵa ózgeríster engízu tártíbí de kúsheıtíledí. Endí Konstıtutsıyaǵa ózgeríster tek jalpyhalyqtyq referendum arqyly qabyldanatyn bolady.
Sóz sońynda Nartaı Sársenǵalıev jańa Konstıtutsıyada «memlekettík bılíktíń bírden-bír bastauy – Qazaqstan halqy» ekení naqty kórsetílgenín atap óttí. Onyń aıtuynsha, būl qaǵıda halyqtyń el taǵdyryndaǵy basty rólín aıqyndaıdy.
Deputat jańa Konstıtutsıya el men jerdíń ıesí sanalatyn halyqtyń múddesíne qyzmet etuí tıís ekenín atap óttí.