"Qazgıdromet" Astana men 13 óńirde kún raıyna baılanysty eskertý jarıalady, - dep habarlaıdy Aqshamnews.kz.
Kásiporynnyń boljamyna qaraǵanda, 14 qańtar kúni Astanada túngi jáne tańǵy mezgilde tuman túsip, joldarda kóktaıǵaq bolýy yqtımal.
Qostanaı oblysynyń ońtústiginde jaıaý burqasyn soǵyp, óńirdiń batysy, soltústigi men shyǵysyn qalyń tuman basady. Jel soltústik-shyǵystan, shyǵystan soǵyp, ońtústikte sekýndyna 15–20 metrge deıin kúsheımek.
Túrkistan oblysynyń soltústiginde jáne taýly aımaqtarynda tuman túsedi. Taýly asýlarda ońtústik-shyǵystan soǵatyn jeldiń ekpini kúndiz 15–20 m/s-qa jetedi.
Batys Qazaqstan oblysynyń batysy men ońtústiginde qar, boran, kóktaıǵaq bolady. Óńirdiń birneshe bóliginde tuman túsip, jeldiń ekpini 15–20 m/s-qa deıin ulǵaıady. Oral qalasynda túngi jáne tańǵy ýaqytta tuman túsedi.
Qyzylorda oblysynyń soltústigi men ortalyǵynda tuman, kóktaıǵaq bolady. Jeldiń ekpini keı jerlerde 23 m/s-qa deıin jetýi múmkin. Qyzylorda qalasynyń ózinde de mezgil-mezgil tuman túspek.
Jetisý oblysynyń shyǵysynda, ortalyǵynda jáne taýly aımaqtarynda tuman túsedi. Soltústik-shyǵystan soǵatyn jeldiń jyldamdyǵy keı jerlerde 15–20 m/s-qa deıin kúsheıedi. Taldyqorǵanda da túnde jáne tańerteń tuman bolady.
Aqmola oblysynyń batysy, soltústigi men shyǵysynda tuman túsip, joldarda kóktaıǵaq paıda bolady. Jeldiń ekpini 15–20 m/s. Kókshetaýda da jol qozǵalysy kúrdelenýi múmkin.
Atyraý oblysynyń soltústigi men batysynda túnde jaýyn-shashyn (jańbyr men qar) bolyp, ol kúndiz de jalǵasady. Kóktaıǵaq pen jaıaý burqasyn soǵady. Atyraý qalasynda tuman men kóktaıǵaq kezektesip otyrady.
Mańǵystaý oblysynda jańbyr men qar aralas jaýyn jaýyp, kóktaıǵaq bolady. Kúndiz jaıaý burqasyn soǵyp, jeldiń ekpini 15–20 m/s-qa jetedi. Aqtaýda da jel kúsheıedi.
Abaı oblysynyń ońtústigi men ortalyǵynda túnde qar jaýyp, tuman bolady. Kúndiz óńirdiń birneshe bóliginde jaıaý burqasyn soǵady. Semeı qalasynda túngi temperatýra kúrt tómendep, 21–23 gradýs aıazǵa deıin jetedi.
Shyǵys Qazaqstan oblysynyń ońtústiginde qar jaýady, al soltústigi men shyǵysynda tuman men boran kútiledi. Óskemende túnde -18–20 gradýs aıaz bolady.
Aqtóbe oblysynyń soltústigi, shyǵysy jáne ortalyǵynda jaıaý burqasyn soǵyp, jeldiń ekpini keı sátterde 25 m/s-qa deıin jetýi múmkin. Aqtóbe qalasynda da jel kúsheıedi.
Ulytaý oblysynyń soltústigi, shyǵysy men ortalyǵynda tuman túsedi. Jel soltústik-shyǵystan soǵyp, ekpini 15–20 m/s bolady. Jezqazǵanda da tuman jıileıdi.
Qaraǵandy oblysynyń birqatar aýmaǵynda tuman túsip, jeldiń ekpini kúsheıedi. Oblys ortalyǵynda da kóriný qashyqtyǵy tómendeýi múmkin.
Mamandar turǵyndardy aýa raıynyń qolaısyzdyǵyna baılanysty saq bolýǵa, al jolǵa shyǵatyndardy asa muqıat bolýǵa shaqyrady.