Mūnda balalardyń dene belsendílígí men ońaltuyna erekshe kóńíl bólíngen, dep habarlaıdy aqshamnews.kz tílshísí.
Arnaıy kabınetter №1, №8, №19, №26, №27, №35, №40 jáne №64 mektepterde, sondaı-aq D.Qonaev atyndaǵy gımnazıya men Q.Sátbaev atyndaǵy mektep-lıtseıde ashyldy. Olar «Samūryq-Qazynanyń» jyl saıynǵy Charity Samruk Marathon qaıyrymdylyq marafony barysynda jınalǵan qarajat esebínen jabdyqtaldy. Jańa ınklyuzıya kabınetteríne 600-den oqushy bara alady. Būl – qaladaǵy erekshe bílím beru qajettílíkterí bar balalardyń 34%-y.
Aqtóbedegí osyndaı kabınetterdíń bírí íske qosylǵan D.Qonaev atyndaǵy mektep-gımnazıyaǵa Aqtóbe oblysynyń ákímí Ashat Shaharov pen «Samūryq-Qazyna» AQ basqarma tóraǵasy Nūrlan Jaqypov arnaıy baryp, jūmysymen tanysty.
Kabınetter Samruk-Kazyna Trust qory men ınklyuzıvtí bílím beru salasynyń sarapshylary bírlesíp ázírlegen jańartylǵan tūjyrymdama negízínde ūıymdastyryldy.
Būrynǵydaı jeke-jeke bólmelerdíń ornyna balanyń jan-jaqty qoldau aluyna múmkíndík beretín, audany kemínde 60 sharshy metr bolatyn zamanauı open space keńístígí qarastyrylǵan. Mūnda defektolog, logoped jáne psıholog mamandardyń jūmys ísteuíne arnalǵan arnaıy aımaqtarmen qatar, balalardyń shyǵarmashylyq qabíletín, ūsaq motorıkasyn jáne ózín-ózí erkín jetkízu daǵdylaryn damytuǵa arnalǵan qysh qūmyra jasau sheberhanasy da bar.
Sonymen qatar balalardyń dene belsendílígí men ońaltuyna erekshe kóńíl bólíngen. Mektepterde zamanauı qūral-jabdyqtarmen jáne sporttyq múkámmalmen jabdyqtalǵan emdík dene shynyqtyru kabınetí jūmys ísteıdí.
Jobada tek kabınetterdí jabdyqtau ǵana kózdelmegen. Bír jyl boıy pedagogter men beıíndí mamandar oqudan ótíp, bílíktílígín arttyrady. Būl olarǵa zamanauı ádístemelerdí meńgeríp, ár balamen jeke jūmys júrgízuge múmkíndík beredí. Osylaısha mūnda jaı ǵana jańa kabınet emes, bílím beru, psıhologıyalyq, túzetu-damytu, dene shynyqtyru jáne ońaltu baǵytyndaǵy qoldau bír keńístíkte toǵysqan tolyqqandy orta qalyptasady.
Jalpy, Aqtóbe oblysynda «Samūryq-Qazyna» kompanıyalar tobynyń atynan qaıyrymdylyq qyzmetíníń bíryńǵaı operatory – Samruk-Kazyna Trust qory qūny 4,88 mlrd teńgení qūraıtyn 32 áleumettík jobany júzege asyrdy. Búgínde óńírde «Qamqorlyq» atty úsh ońaltu ortalyǵy, M.Ospanov atyndaǵy BQMU janyndaǵy onkologıyalyq bólímshe, S.Jıenbaev atyndaǵy kítaphana bazasyndaǵy kreatıvtí hab jáne Embí qalasyndaǵy sport keshení jūmys ísteıdí. Al bıyl Aqtóbe qalasynda jańa dene shynyqtyru-sauyqtyru kesheníníń qūrylysy júrgízílude.
