2026 jylǵy 1 qańtardan bastap Qazaqstanda jańa Salyq kodeksi qoldanysqa engizildi. Soǵan sáıkes arnaýly salyq rejımderiniń sany úshke deıin qysqartyldy. QR Qarjy mınıstrligi Memlekettik kirister komıteti kásipkerlerge qandaı rejımder qarastyrylǵanyn jáne qandaı jaǵdaıda 2026 jylǵy 1 naýryzǵa deıin salyq rejımin tańdaý týraly habarlama berý qajet ekenin túsindirdi, dep habarlady Aqshamnews.kz.
Jańa Salyq kodeksinde kelesi úsh arnaýly salyq rejımi kózdelgen: ózin-ózi jumyspen qamtyǵandar úshin; ońaılatylǵan deklarasıa negizindegi rejım; sharýa jáne fermer qojalyqtary úshin.
«Jańa Salyq kodeksi aıasynda arnaýly salyq rejımderiniń sany qysqartyldy, ıaǵnı olar úshke deıin ońtaılandyryldy. Buǵan deıin olardyń sany jeti bolǵan. Qazirgi tańda úsh arnaýly salyq rejımi qaldy. Birinshisi – ońaılatylǵan deklarasıa negizindegi arnaýly salyq rejımi. Ekinshisi – ózin-ózi jumyspen qamtyǵandarǵa arnalǵan arnaýly salyq rejımi. Úshinshisi – sharýa jáne fermer qojalyqtaryna arnalǵan arnaýly salyq rejımi», - dep atap ótti QR QM Memlekettik kirister komıtetiniń Arnaýly salyq rejımderin ákimshilendirý basqarmasynyń basshysy Erqanat Shyńbergen.
Kásipkerler neni bilýi tıis:
Ońaılatylǵan deklarasıa negizindegi ASR
Osy rejımdi qoldanýdy josparlap otyrǵan salyq tóleýshiler 2026 jylǵy 1 naýryzǵa deıin qoldanylatyn salyq salý rejımi týraly habarlama usynýy qajet.
Eger kórsetilgen merzimde habarlama usynylmasa, salyq tóleýshiler 2026 jylǵy 1 qańtardan bastap avtomatty túrde jalpyǵa birdeı belgilengen salyq salý tártibine aýystyrylady.
Habarlamany:
- Salyq tóleýshiniń kabıneti (AJ SÁIJ júıesinde «Qujattardy tapsyrý» – «Qoldanylatyn salyq salý rejımi týraly habarlama» bólimi).
- E-Salyq Business arnaıy mobıldi qosymshasy arqyly («Qyzmet» – «JK salyq salý rejımin ózgertý» bólimi).
- Qaǵaz nusqada ornalasqan jeri boıynsha MKB arqyly;
- Bankterdiń mobıldi qosymshalary arqyly (qazirgi ýaqytta bul servıs Kaspi Bank qosymshasynda «Memlekettik qyzmetter» – «JK rekvızıtteri men salyq rejımin ózgertý» bóliminde iske asyrylǵan) berýge bolady.
Ózin-ózi jumyspen qamtyǵandarǵa arnalǵan arnaýly salyq rejımine kóshý
2026 jylǵy 1 naýryzdan bastap salyq organdary 2025 jyly patent negizindegi ASR nemese arnaıy mobıldi qosymshasy arqyly ASR qoldanǵan salyq tóleýshilerdi JK retinde esepten avtomatty túrde shyǵarady.
Esepten shyǵarý kúni retinde 2026 jylǵy 1 qańtar tanylady, bul rette salyq tóleýshiniń esepten shyǵý týraly ótinishti óz betinshe berý quqyǵy saqtalady.
Eger salyq tóleýshi qoldanylatyn salyq salý rejımi týraly habarlama tapsyryp, ózge rejımdi tańdaǵan jaǵdaıda, esepten shyǵarý júrgizilmeıdi. Bul rette ózin-ózi jumyspen qamtyǵandarǵa arnalǵan ASR qoldana bastalǵan kúni retinde E-Salyq Business mobıldi qosymshasynda alǵashqy chek qalyptastyrylǵan kúnnen tanylady.
Sharýa jáne fermer qojalyqtary úshin arnaýly salyq rejımine kóshý
Atalǵan rejımge kóshý 2026 jylǵy 1 naýryzǵa deıin salyq organdary arqyly avtomatty túrde júzege asyrylady jáne habarlama tapsyrýdy talap etpeıdi.
Eske sala keteıik, buǵan deıin jańa Salyq kodeksinde qandaı ózgerister qarastyrylǵanyn jazdyq.