Buyn, omyrtqa, būlshyqet jáne dáneker tín aurulary bayau damyp, alǵashqy belgílerí baıqalmaı ótuí múmkín. Uaqytynda dárígerge qaralu aurudyń damuyn toqtatyp, ómír sapasyn saqtauda sheshushí ról atqarady.
Eger sízde kelesí shaǵymdar bolsa, revmatologqa baru qajet, olar:
- Buyndar men būlshyqetterdegí auyrsynu nemese tańerteńgí qataıyp qalu, qozǵalystyń shekteluí;
- Buynnyń ísínuí, qyzaruy, dene qyzuynyń joǵarylauy nemese píshíníníń ózgeruí;
- Únemí sharshap júru, álsízdík, tábettíń tómendeuí, salmaq joǵaltu, dene qyzuynyń sebepsíz kóteríluí (37,5°C jáne odan joǵary);
- Bórtpe, qyzaru, qabyrshaqtanu, auyz quysynda jaralar, terí bederíníń ózgeruí, ásírese buyn mańynda;
- Qol-ayaqtaǵy ūyu, shanshu, álsízdík.
Angına nemese streptokokkty ınfektsıyalardan keıín revmatologqa qaralu mańyzdy, sebebí būl aurular buyn men júrekke áser etuí múmkín. Eger jaqyn tuystaryńyzda revmatıkalyq aurular bolǵan bolsa, sízde de mūndaı aurulardyń damu qaupí joǵary.
Kardıologıya jáne íshkí aurular ǴZI №2 terapıya bólímshesíníń meńgerushísí, revmatolog dáríger Maısa Qalyqovanyń aıtuynsha, revmatologıyada «múmkíndík terezesí» degen ūǵym bar – būl aurudyń alǵashqy kezeńí, yaǵnı qabynu protsesí álí de qaıtymdy jáne der kezínde bastalǵan em aurudyń damuyn toqtatuǵa múmkíndík beredí. Uaqytynda dıagnoz qoıylyp, em bastalsa, tūraqty remıssıyaǵa qol jetkízuge, buyndardyń būzyluyna jol bermeuge jáne nauqastyń belsendí ómírín saqtauǵa bolady.
Qazírgí tańda revmatıkalyq aurulardy emdeude «maqsatqa baǵyttalǵan em» (treat to target) qaǵıdasy keńínen qoldanylady. Būl tásílde dáríger emdí jeke tańdap, auru belsendílígín tūraqty baqylauda ūstaıdy jáne naqty nátıjege – qabynudyń tolyq basyluy men buyn qyzmetíníń qalpyna keluíne qol jetkízgenge deıín terapıyany túzetíp otyrady.
Auru belgílerí baıqalǵan sátten bastap revmatologqa qaralu – emníń tıímdílígín arttyryp, asqynulardyń aldyn aludyń eń mańyzdy qadamy. Típtí jeńíl tańerteńgí qataıyp qalu, buyndardaǵy mezgíl-mezgíl auyrsynu nemese terídegí ózgerísterdíń ózí de revmatıkalyq aurudyń alǵashqy belgísí boluy múmkín.
Sımptomdardyń kúsheyuín kútpeı, erte kezeńde tekserílíp, qajet bolsa em bastańyz. Uaqtyly kómek – densaulyq pen belsendí ómírdíń kepílí.