Prezıdent Qasym-Jomart Toqaev Austrıya europalyq jáne halyqaralyq íster federaldyq mınıstrí Beate Maınl-Raızınger men Austrıya íshkí íster federaldyq mınıstrí Gerhard Karnermen kezdesu ótkízdí, – dep habarlaıdy aqshamnews.kz tílshísí.
Memleket basshysy mártebelí meımandarǵa íltıpat bíldíríp, elímízge Austrıya mınıstrlerímen bírge ískerlík orta ókílderínen qūralǵan delegatsıyanyń keluí mańyzdy ekenín atap óttí.
– Austrıya Úkímetíníń ekí bírdeı mınıstríníń elímízge saparmen keluí ózara yntymaqtastyqty nyǵaıtu tūrǵysynan óte mańyzdy. Austrıya – Qazaqstannyń senímdí árí būrynnan kele jatqan strategıyalyq seríktesí. Sízderdíń ekonomıkamyzǵa qūıǵan ınvestıtsıyalaryńyz 3 mıllıard dollardan asty, sondaı-aq sauda aınalymynyń kólemí ūlǵaıyp keledí. Būl óte jaqsy úrdís. Bíz Bíríkken Ūlttar Ūıymy jáne EQYŪ ayasynda tyǵyz qarym-qatynas ornattyq. Mūndaı baılanystar aldaǵy uaqytta da jalǵasa beredí dep oılaımyn. Austrıya – kóptegen baǵytta qarqyndy damyǵan el. Sondyqtan qol jetkízílgen yntymaqtastyq deńgeıín joǵary baǵalaımyz. Sízder úshín Qazaqstan aımaqtaǵy mańyzdy rólín saqtap qalady degen senímdemíz. Qazírgí tańda Austrıyanyń Ortalyq Azıya memleketterímen aradaǵy sauda qatynastarynda Qazaqstannyń úlesí 80 paıyzdan joǵary, – dedí Qasym-Jomart Toqaev.
Prezıdent ekí eldíń salalyq mınıstrlíkterí men vedomstvolary arasyndaǵy yqpaldastyqtyń jandanuyn qūptady. Atap aıtqanda, bıyl mamyr aıynan bastap dıplomatıyalyq pasport ıelerí úshín vızasyz rejım turaly jáne readmıssıyalau jóníndegí kelísímder kúshíne endí.
Memleket basshysy zamanauı syn-qaterlerdíń transshekaralyq sıpaty ūlǵaıyp bara jatqanyna toqtalyp, osy oraıda qūqyq qorǵau organdarynyń ózara baılanystaryn tereńdetu qajet ekenín aıtty.