Astana qalasyndaǵy «Ázíret Sūltan» meshítínde Qazaqstan mūsylmandary dínı basqarmasynyń ūıymdastyruymen ótken Í respublıkalyq «Úzdík ımam» ıntellektualdy bílím saıysynyń saltanatty marapattau rásímí óttí, dep habarlaıdy aqshamnews.kz QMDB Baspasóz qyzmetíne sílteme jasap.
Marapattau rásímíne arnaıy qatysqan QMDB Tóraǵasy, Bas múftı Nauryzbaı qajy Taǵanūly saıystyń mańyzdylyǵyna toqtalyp, qatysushylarǵa rızashylyǵyn bíldírdí.
«Búgínde Qazaqstan mūsylmandary dínı basqarmasynyń basty míndetíníń bírí– dín qyzmetkerleríníń bílíktílígín úzdíksíz kóteríp, el bírlígíne, qoǵam tūraqtylyǵyna, otbasy qūndylyqtaryna, ízgílík pen adamgershílíkke úndeıtín sauatty dínı kadrlar dayarlau. Óıtkení ımam meshít qyzmetkerí ǵana emes, ol qoǵamnyń ruhanı tíregí, ūlttyq tárbıeníń, el tynyshtyǵy men ūlt bírlígíníń ūıytqysy. Búgíngí bílím saıysy árbír ımamnyń óz áleuetín kórsetíp, bílímín shyńdap, tájírıbesín baıytuyna úlken múmkíndíktuǵyzdy dep esepteımín. Bílím saıysyna elímízdíń ár oblysynan íríktelíp kelgen eń úzdík ımamdar ózderíníń bílímí men parasyn pash ettí. Sondyqtan osy saıysqa qatysqan árbír ımam jeńímpaz atandy dep sanaımyn. Alla qalasa, ımamdar arasyndaǵy būl jarys jyl saıyn jańa deńgeıde ūıymdastyrylyp, dástúrge aınalady degen senímdemín», – dedí Bas múftı.
Ádílqazylar alqasynyń sheshímímen Í respublıkalyq «Úzdík ımam» ıntellektualdy bílím saıysynyń jeńímpazdary tómendegídeı:
- I oryn: Bekzat Azatbekūly Qūsanbaev – ShQO, Óskemen qalalyq ortalyq meshítíníń naıb ımamy (500 myń teńge)
- II oryn: Nūrlan Mūrat – Jambyl oblystyq «Hıbatulla Taraz» meshítíníń naıb ımamy (400 myń teńge)
- III oryn: Quanysh Toqsanbaıūly Ábíshev – Almaty qalalyq Ortalyq meshítíníń naıb ımamy (300 myń teńge)
Sonymen qatar, jarysqa qatysyp, júldegerler qataryna enbegen ımamdarǵa 50 000 teńgeden yntalandyru syıaqysy beríldí.
