Respublıka kúní qarsańynda Almaty qalasyndaǵy bír mekteptíń oqushylary halyqaralyq akademıyalyq jetístíkterímen quantty. 11-synyp oqushysy Júsípqyzy Jasmın SAT halyqaralyq emtıhanynan 1600 baldyń 1600-yn jınap, eń joǵary nátıjege qol jetkízdí, – dep habarlaıdy aqshamnews.kz tílshísí.
Sonymen qatar, osy mekteptíń taǵy 12 oqushysy SAT emtıhanynan 1500-den joǵary ball jınady. Būl kórsetkísh oqushylardyń joǵary akademıyalyq daıyndyǵy men halyqaralyq deńgeıdegí bílímge ūmtylysyn aıǵaqtaıdy.
Shoqan Uálıhanov atyndaǵy jekemenshík mektepte akademıyalyq bílímmen qatar, oqushylardyń synı oılauyn, shyǵarmashylyq qabíletín jáne ūlttyq qūndylyqtarǵa qūrmetín damytuǵa erekshe mán beríledí. Mektepte grant negízínde bílím alatyn oqushylar da bar.
Ūlttyq qūndylyqtardy dárípteu mektep ómíríníń mańyzdy bólígí sanalady.
Oqushylar 1-synyptan bastap dombyra tartudy úırenedí. Ūlttyq ónerge degen qūrmet shetelde bílím alyp júrgen túlekterdíń de ómírínen kórínís tabuda. Osy mektepten Garvard unıversıtetíne túsken ekí túlek Respublıka kúníne oraı shetelden kúı oryndap, merekelík qūttyqtau joldady.
SAT (Scholastic Assessment Test) — sheteldík joǵary oqu oryndaryna túsu kezínde qoldanylatyn standarttalǵan emtıhan. Ol matematıka, oqu jáne jazu daǵdylaryn baǵalaıdy. Emtıhannyń eń joǵary nátıjesí — 1600 ball.
Aldaǵy toqsanaralyq demalys kezínde mekteptíń taǵy bírneshe oqushysy SAT emtıhanyna daıyndyqtaryn jalǵastyrady. Sondyqtan aldaǵy uaqytta jańa nátıjeler jarıyalanuy múmkín.
Oqushylardyń būl jetístíkterí — júıelí eńbektíń, sapaly bílímníń jáne úlken maqsattarǵa ūmtylystyń nátıjesí. Respublıka kúní qarsańynda qol jetkízílgen būl kórsetkíshter Qazaqstannyń zıyatkerlík áleuetín arttyruǵa úles qosatyn bílímdí ūrpaq ósíp kele jatqanyn kórsetedí.