25 qazanda Almatyda Respublıka kúníne oraı «Taza Qazaqstan» ekologıyalyq aktsıyasy ótíp, Úlken jáne Kíshí Almaty shatqaldary men Medeu aumaǵynda tazalyq jūmystary júrgízíldí, – dep habarlaıdy aqshamnews.kz tílshísí.
Ís-sharaǵa qala ákímdígíníń qyzmetkerlerí, ūlttyq park ókílderí, jastar ūıymdary, eríktíler men qala tūrǵyndary qatysty.
Ekologıyalyq aktsıyanyń maqsaty – tabıǵı aumaqtardy tūrmystyq qaldyqtardan tazartu, qorshaǵan ortany qorǵau jáne tūrǵyndar men turısterdíń ekologıyalyq mádenıetín arttyru.
Almaty qalasy Turızm basqarmasynyń basshysy Ǵalıya Toqseıítovanyń aıtuynsha, tauly shatqaldar qaladaǵy turıster jıí baratyn oryndardyń qataryna jatady. Kelushíler sanynyń artuy tabıǵı ortaǵa túsetín júktemení de kóbeıtedí.
– Kíshí Almaty shatqalynda tazalyq jūmystary saǵat 12:00-de Kíshí Almaty ózeníníń arnasyn boılaı júrgízíldí. Būl aumaqty tazartuǵa 300 adam qatysty. Al Úlken Almaty shatqalynda saǵat 14:00-de bastalǵan aktsıyaǵa 150 adam jūmyldyryldy. Jalpy, ekí shatqaldaǵy tazalyq jūmystaryna 450 adam qatysty. Tauly shatqaldar – qaladaǵy eń kóp baratyn turıstík baǵyttardyń bírí. Turıster aǵyny artqan saıyn qorshaǵan ortaǵa túsetín salmaq ta kóbeıedí. Tazalyq jūmystary tūraqty júrgízílgeníne qaramastan, keıbír kelushíler qoqys qaldyryp, tabıǵı aumaqtardy lastap, ekojúıege zıyan keltíredí, – dedí ol.
Almaty qalasy Bostandyq audanynyń ákímí Azamat Qaldybekov ekologıyalyq mádenıettí qalyptastyruda ár azamattyń jauapkershílígí mańyzdy ekenín atap óttí.
– Respublıka kúníne oraı «Taza Qazaqstan» ekologıyalyq aktsıyasy óttí. Sońǵy bír jyldyń íshínde qalaǵa 1,5 mıllıonnan astam turıst kelgen. Tabıǵatty qorǵau úshín ár azamattyń sanasy ózgeruí kerek. Tūrǵyndar men qonaqtardyń ekologıyalyq mádenıetín qalyptastyruǵa kúsh saluymyz qajet. Sondyqtan barsha qala tūrǵynyn osy ıgí íske atsalysuǵa shaqyramyn, – dedí ol.
«Íle-Alatau» memlekettík ūlttyq tabıǵı parkí dırektorynyń orynbasary Hamıt Ahmetov te tabıǵatty qorǵau ár azamattyń míndetí ekenín aıtty.
– «Taza bolsa tabıǵat, aman bolar adamzat» demekshí, tabıǵatty qorǵau – ár azamattyń míndetí. Úlken Almaty shatqalynda ekologıyalyq aktsıyanyń ótuíne kelushíler men turısterden keıín qalatyn tūrmystyq qaldyqtar sebep bolyp otyr. Qoqys tabıǵı ortaǵa zıyan keltíríp, ekojúıeníń tepe-teńdígíne áser etuí múmkín. Sondyqtan árbír demalushy ózínen keıín tazalyq saqtap, qoqysyn belgílengen orynǵa tastauy kerek. Tabıǵatty qorǵau bír kúndík aktsıyamen shektelmeı, kúndelíktí ádetke aınaluǵa tıís, – dedí ol.
Tauly aumaqtardyń tazalyǵyn saqtau maqsatynda Almaty qalasynyń Polıtsıya departamentí monıtorıng pen patruldeudí kúsheıttí. Qūqyqbūzushylyqtardyń aldyn alu, ekologıyalyq talaptardyń saqtaluyn baqylau jáne tabıǵı aumaqtardy lastamau jóníndegí jūmystar tūraqty túrde jalǵasady.
Tabıǵı aumaqtardy taza ūstau – tek kommunaldyq jáne tabıǵatty qorǵau qyzmetteríníń emes, barsha tūrǵyn men qala qonaǵynyń ortaq míndetí. Qorshaǵan ortaǵa jauapkershílíkpen qarau, qoqys qaldyrmau jáne tabıǵı nysandardy qorǵau Almatynyń kóríktí tau shatqaldaryn keler ūrpaqqa saqtap jetkízuge múmkíndík beredí.