Prezıdent Qasym-Jomart Toqaevtyń atyna shet memleketter basshylary men halyqaralyq ūıymdar jetekshílerínen ūlttyq mereke – Respublıka kúníne baılanysty qūttyqtaular kelíp túsíp jatyr.
Reseı Prezıdentí Vladımır Putın jedelhatta Qazaqstannyń ekonomıkalyq jáne áleumettík salalarda qol jetkízgen tabystaryna toqtalyp, elímízdíń halyqaralyq qarym-qatynasta salmaqty árí syndarly ról atqaratynyn, sondaı-aq álemde abyroı-bedelí bıík ekenín atap ótken.
– Reseı men Qazaqstan arasyndaǵy baılanystar strategıyalyq seríktestík pen odaqtastyq ruhynda jemístí ílgerílep keledí. Barlyq baǵyttaǵy ózara tıímdí yntymaqtastyǵymyzdy dostas halyqtarymyzdyń ıgílígí úshín, sondaı-aq Eurazıya keńístígíndegí qauípsízdík pen tūraqtylyqty nyǵaıtu jolynda dáıektí túrde tereńdete beremíz dep senemín, – dep jazdy Vladımır Putın.
Qytaı Halyq Respublıkasynyń Tóraǵasy Sı Tszınpın Qazaqstanda auqymdy sayası reformalar íske asyrylǵanyn atap ótíp, qoǵamdyq tūraqtylyqty qamtamasyz etu, ekonomıkalyq ósímníń ornyqtylyǵyn saqtau, halyqtyń ál-auqatyn kóteru, eldíń óńírlík jáne halyqaralyq pozıtsıyasyn nyǵaıtu baǵytynda qarqyndy jūmys júrgízílíp jatqanyna nazar audarǵan.
– Qazaq-qytaı qarym-qatynasyn ílgeríletuge erekshe mán beremín. Ekíjaqty yntymaqtastyqty odan árí tereńdetu maqsatynda bírlese kúsh jūmyldyruǵa, sondaı-aq halyqtarymyzdyń ıgílígí úshín yqpaldastyq mazmūnyn baıytuǵa ázírmín, – dedí Sı Tszınpın.
Būǵan deıín Memleket basshysynyń atyna qūttyqtau hatyn AQSh Prezıdentí Donald Tramp ta joldaǵan bolatyn.
– Memleketterímíz arasyndaǵy Keńeıtílgen strategıyalyq seríktestíktí joǵary baǵalaımyn jáne men prezıdenttík lauazymdy atqarǵan ekí merzímde qalyptasqan berík baılanysty odan árí nyǵaıtamyz dep senemín. Osy quanyshty sáttí sízdermen bólísu – men úshín zor mártebe, – dep jazǵan Donald Tramp.
Ózbekstan Prezıdentí Shavkat Mırzıyoev keıíngí jyldary ekí el basshylarynyń bírlesken erík-jígeríníń arqasynda Qazaqstan men Ózbekstan arasynda ornaǵan strategıyalyq seríktestíkke jáne odaqtastyq qarym-qatynasqa kóńílí tolatynyn jetkízgen. Būl tatu kórshílík pen tyǵyz dostyq qaǵıdattaryna negízdelgen baılanystarymyzdyń sony sıpatqa ıe bolǵanyn kórsetedí.
Qyrǵyzstan Prezıdentí Sadyr Japarov 1990 jyly 25 qazanda Memlekettík egemendík turaly deklaratsıyanyń qabyldanuy Qazaqstannyń táuelsízdígíne jol ashqanyn, sondaı-aq eldíń tarıhı mūraǵa adaldyǵyn jáne halyqtyń derbes el bolashaǵynyń írgesín qalau jónínde batyl sheshím qabyldaǵanyn pash etkenín atap ótken.
Tájíkstan Prezıdentí Emomalı Rahmon Qazaqstanmen aradaǵy tarıhı dástúrdí, ózara qūrmettí jáne senímdí arqau etken dostyq qarym-qatynas pen yntymaqtastyqty joǵary baǵalaıtynyn jazǵan.
Túríkmenstan Prezıdentí Serdar Berdímūhamedov qūttyqtauynda Qazaqstan egemendík jyldarynda memlekettílíktí nyǵaıtuda, halyqtyń ál-auqatyn jaqsartuda jáne eldíń halyqaralyq arenadaǵy bedelín arttyruda aıtarlyqtaı tabysqa jetkeníne nazar audarǵan.
Túrkıya Prezıdentí Rejep Taııp Erdoǵan tarıhı jáne mádenı tamyry bíte qaınasqan ekí eldíń erekshe qarym-qatynasy qos halyqtyń ıgílígí úshín keńeıtílgen strategıyalyq seríktestík ruhynda tereńdeı beretíníne sením bíldírgen.
– Bıyl 14 mamyrda Astanada ótken Qazaqstan men Túrkıyanyń Joǵary deńgeıdegí strategıyalyq yntymaqtastyq keńesíníń altynshy otyrysy, sondaı-aq Túrkístanda ūıymdastyrylǵan Túrkí memleketterí ūıymynyń beıresmı sammıtí strategıyalyq seríktestígímízdíń beríktígín aıqyn kórsettí, – dedí Rejep Taııp Erdoǵan.
Ázerbaıjan Prezıdentí Ilham Álıev Ázerbaıjan halqy bauyrlas el retínde Qazaqstannyń eleulí tabystaryna rıyasyz quanatynyn jazdy.
– Ózara tūraqty saparlarymyz, kezdesulerímíz ben joǵary deńgeıdegí belsendí dıalog ekíjaqty qarym-qatynastardy anaǵūrlym qarqyndy damytyp, strategıyalyq seríktestíktí, sondaı-aq odaqtastyqty nyǵaıtu jáne ony jańa mazmūnmen baıytu ísínde mańyzdy ról atqarady. Sízdíń juyrda AÓSShK jetínshí sammıtíne qatysu úshín Ázerbaıjanǵa saparmen kelgeníńízdí joǵary baǵalaımyn, – dedí Ilham Álıev.
Frantsıya Prezıdentí Emmanyuel Makron jedelhatta ízgí tílegí men yqylasyn bíldírdí.
– Qazaqstan jūrtshylyǵyna frantsuz halqynyń shynaıy dostyq nıetín jetkízuíńízdí ótínemín. Dıplomatıyalyq baılanystardyń 35 jyldyǵy ayasynda jáne Qazaqstan táuelsízdík alǵan sátten berí elderímíz ekíjaqty yntymaqtastyqty dáıektí túrde nyǵaıtyp, beıbít, órkendegen jáne ornyqty álem qūru jolynda ózara kúsh-jíger bíríktíríp kele jatqanyn, kóptegen halyqaralyq másele boıynsha ūstanymdary ūqsas ekenín atap ótkím keledí, – delíngen jedelhatta.
Ūlybrıtanıya jáne Soltústík Irlandıya Bíríkken Koroldígíníń Korolí ÍÍÍ Charlz Qasym-Jomart Toqaevqa jáne Qazaqstan azamattaryna jyly lebízín joldady. Korol ÍÍÍ Charlz ekí el arasyndaǵy berík dostyqqa joǵary baǵa beríp, ekíjaqty baılanystardyń bekı túskenín jáne aldaǵy jyldary ózara tıímdí yntymaqtastyq ayasyn odan árí keńeıtuge beıíl ekenín rastaǵan.
Koreya Prezıdentí Lı Chje Myoń Qazaqstan memlekettílíktíń baı dástúríne, qoǵamdaǵy tūraqtylyqqa jáne ūlttyq bírlíkke arqa súıeı otyryp, jasampazdyq pen jarqyn keleshek jolynda nyq qadam basa beretíníne sením bíldírdí.
– Bıyl qyrkúıek aıynda Seulge jasaǵan memlekettík saparyńyzdyń qorytyndysy boıynsha Qazaqstan men Koreya Respublıkalary arasynda bolashaqqa baǵdarlanǵan jan-jaqty strategıyalyq seríktestík qarym-qatynas ornaǵanyn aıryqsha atap ótkím keledí, – delíngen jedelhatta.
Sondaı-aq qūttyqtau lebízderín Germanıya Prezıdentí Frank-Valter Shtaınmaıer, Italıya Prezıdentí Serdjo Mattarella, Austrıya Prezıdentí Aleksandr Van der Bellen, Shveıtsarıya Prezıdentí Gı Parmelan, Belarus Prezıdentí Aleksandr Lukashenko, Armenıya Premer-mınıstrí Nıkol Pashınyan, BAÁ Prezıdentí, sheıh Mūhammed ben Zaıd Ál Nahayan, BAÁ Vıtse-prezıdentí, Premer-mınıstrí, Dubaı Ámírshísí, sheıh Mūhammed ben Rashıd Ál Maktum, BAÁ Vıtse-prezıdentí, Premer-mınıstrdíń orynbasary, Prezıdent Ákímshílígíníń jetekshísí, sheıh Mansūr ben Zaıd Ál Nahayan, Oman Sūltany Haısam ben Tarıq, Qos kıeníń saqshysy, Saud Arabıyasynyń Korolí Salman ben Ábdelázız Ál Saud, Saud Arabıyasynyń Taq mūragerí, Premer-mınıstrí Mūhammed ben Salman ben Ábdelázız Ál Saud, Belgıyalyqtar Korolí Fılıpp, Ispanıya Korolí VI Felıpe, Shvetsıya Korolí XVI Karl Gustav, Monako Knyazí II Alber, Bahreın Korolí Hamad ben Isa Ál Halıfa, Japonıya Imperatory Naruhıto, Taıland Korolí Maha Vachıralongkorn, Rım Papasy XIV Leo, Serbıya Prezıdentíníń míndetín atqarushy Ana Brnabıch, Iran Prezıdentí Masud Pezeshkıan, Pákístan Prezıdentí Asıf Alı Zardarı, Pákístan Premer-mınıstrí Shahbaz Sharıf, Palestına Prezıdentí Mahmūd Abbas, Indonezıya Prezıdentí Prabovo Subıanto, Myanma Prezıdentí Mın Aun Hlaın, Sıngapur Prezıdentí Tarman Shanmugaratnam, Vetnam Prezıdentí To Lam, Laos Prezıdentí Thonglun Sısulıt, Chehıya Prezıdentí Petr Pavel, Rumynıya Prezıdentí Nıkushor Dan, Slovenıya Prezıdentí Natasha Pırts-Musar, Lıtva Prezıdentí Gıtanas Nauseda, Malta Prezıdentí Mırıam Spıterı Debono, Bolgarıya Prezıdentí Ilıyana Iotova, Efıopıya Prezıdentí Taıe Atske-Selassıe, Nıkaragua teń prezıdentterí Danıel Ortega men Rosarıo Murılo, BŪŪ Bas hatshysy Antonıu Guterrısh, Europalyq Keńes Tóraǵasy Antonıu Koshta, YuNESKO Bas dırektory Haled ál-Ananı, TMD Bas hatshysy Sergeı Lebedev jáne basqa da resmı tūlǵalar joldady.
Qūttyqtau jedelhattary álí de kelíp túsíp jatyr.