Joba barysymen tanysu úshín qala ákímíníń orynbasary Abzal Núkenov qūrylys alańyna bardy, – dep habarlaıdy aqshamnews.kz tílshísí.
Almatyda Raıymbek batyr kesenesí aumaǵynda írí memorıaldyq keshenníń qūrylysy qarqyndy júríp jatyr. Joba tarıhı tūlǵanyń erlígín ūlyqtap, ūlttyq ruhty kúsheıtuge jáne tarıhı sanany jańǵyrtuǵa baǵyttalǵan.
Qūrylys jūmystary josparǵa saı kezeń-kezeńímen júrgízílíp jatyr. Nysandardy salumen qatar aumaqty kórkeıtu, kógaldandyru jáne ınjenerlík ınfraqūrylymdy damytu qatar atqarylyp jatyr. Bolashaqta keshen zamanauı, jaıly qoǵamdyq keńístíkke aınalmaq.
Mamandar atqarylǵan jūmystar turaly bayandap, aldaǵy josparyn aıtty. Kezdesu barysynda ákímníń orynbasary qūrylys sapasy men qauípsízdík talaptaryn saqtau máselesín talqylap, merdígerlerge naqty tapsyrmalar júktedí.
Keshen ornalasatyn aumaqtyń jalpy kólemí 41 sotyq, al qūrylys alańy 1481 sharshy metr bolady. Onyń íshínde 846,7 sharshy metrí muzeıge arnalǵan. Keshen qūramyna eskertkísh, batyrdyń ómírí men erlígíne arnalǵan kórme zaldary, sondaı-aq mádenı jáne bílím beru ís-sharalaryna arnalǵan keńístíkter enedí.
Muzeı zamanauı úlgíde jasaqtalyp, jasandy ıntellekt, multımedıyalyq jáne ınteraktıvtí tehnologıya keńínen qoldanylady. Kelushíler VR-turlar arqyly tarıhı oqıǵalardy sezíníp, tsıfrlyq kórme men ınteraktıvtí tanystyrylym arqyly tarıhı-mádenı mūrany tereńírek tanyp-bíle alady.
Sonymen qatar, ınteraktıvtí aımaqtar da qarastyrylǵan. Olardyń qatarynda VR negízíndegí «Aqyldy sadaq» jáne kúshtí ólsheıtín «Batyr kúshí» keskíndemesí bar.
Qazír muzeı qoryn jasaqtau jūmystary júrgízílude. Keshendí paıdalanuǵa beru 2026 jyldyń sońyna josparlanǵan. Būl joba ūlttyq qūndylyqtardy dáríptep, tarıhı jadty jańǵyrtuǵa jáne sanaly ūrpaq tárbıeleuge serpín beredí.