Bíshkektegí jekemenshík mektepterdíń bírínde jappaı ulanu tírkeldí. Ulanǵandardyń bárí túskí asqa shaurma jegen, - dep habarlaıdy aqshamnews.kz tílshísí 24.kg saıtyna sílteme jasap.
Qyrǵyzstan Densaulyq saqtau mınıstrlígíníń málímetínshe, 31 qazanda saǵat 22:30-da Respublıkalyq klınıkalyq jūqpaly aurular auruhanasyna taǵamnan ulanu belgílerí bar nauqastar túse bastaǵan. Barlyq nauqastyń 12:00-13:00 aralyǵynda mektep ashanasynda shaurma jegení anyqtaldy.
Barlyǵy 58 nauqas medıtsınalyq kómekke júgíngen, olardyń 54-í - bala.
"7 bala jáne 2 eresek auruhanaǵa jatqyzyldy, jaǵdaıy tūraqty. 49 nauqas qaraudan jáne medıtsınalyq kómek kórsetílgennen keıín tıístí nūsqaulyqpen ambulatorlyq emdeuge jíberíldí. Barlyq nauqastan taldaular alyndy", - delíngen jarıyalanymda.
Sanıtarlyq-epıdemıologıyalyq qyzmet mamandary būl oqıǵa boıynsha tergeudí jalǵastyryp jatyr.