Quyrshaq teatry Halyqaralyq Shekspır festıvalínde alǵash ret qazaq tílíndegí spektakl ūsyndy, – dep habarlaıdy aqshamnews.kz tílshísí.
Memlekettík akademıyalyq quyrshaq teatry Kraıova qalasynda (Rumynıya) ótken halyqaralyq «The Craiova International Shakespeare Festival» festıvalí ayasynda eresekterge arnalǵan «Romeo men Djuletta» spektaklín ūsynyp, europalyq kórermender tarapynan joǵary baǵasyna ıe boldy.
«The Craiova International Shakespeare Festival» – ūly dramaturg Uılyam Shekspırdíń shyǵarmashylyq mūrasyn zamanauı tūrǵyda zerdeleuge, teatr ónerín damytuǵa jáne tájírıbe almasuǵa baǵyttalǵan eń aıtuly halyqaralyq teatr alańdarynyń bírí. Festıval 1994 jyldan berí Kraıova qalasyndaǵy Marın Soresku atyndaǵy Ūlttyq teatrdyń bastamasymen ekí jylda bír ret ótkízílíp keledí. Bıylǵy festıval 21-31 mamyr aralyǵynda ótíp, álemníń 28 elínen kelgen 90-nan astam shyǵarmashylyq ūjymdy bíríktírdí. On kún íshínde kórermenderge shamamen 300 mádenı ís-shara ūsynyldy.
Memlekettík akademıyalyq quyrshaq teatry būl áıgílí halyqaralyq festıvalge 2025 jyly Frantsıyanyń Avınon qalasynda ótken halyqaralyq «Off Avignon» teatr festıvalínen keıín arnaıy shaqyrtu alǵan bolatyn. Sol kezde «Romeo men Djuletta» spektaklí álemge áıgílí mahabbat hıkayasynyń erekshe kameralyq ınterpretatsıyasy arqyly halyqaralyq teatr mamandarynyń nazaryn audarǵan edí.
«Romeo men Djuletta» spektaklí 2019 jyly rejısser Dına Jūmabaevanyń jetekshílígímen sahnalandy. Qoıylymnyń horeografy – Anna Tsoı, qoyushy-suretshísí – Yulıya Chernova. Spektakl būǵan deıín Frantsıya, Kanada, Bolgarıya, Reseı, Túrkıya jáne Qazaqstandaǵy halyqaralyq teatr festıvalderínde joǵary marapattarǵa ıe boldy. Kraıova qalasyndaǵy qoıylymda artıster Ūlan Adambaev, Bota Tabyldıeva, Maqsat Kamalov, Shohan Qūlnazarov, Elmıra Qūmarova jáne Araılym Baıyrbekova óner kórsettí.
Kraıovadaǵy kórsetílím kórermenderdíń zor qyzyǵushylyǵyn tudyrdy. Lyq toly zal men spektakl ayaqtalǵannan keıíngí ūzaq qol shapalaqtau kórermenderdíń ystyq yqylasyn aıqyn kórsettí. Artısterdíń jandy oıyny, quyrshaq júrgízudegí sheberlígí, plastıka men horeografıyanyń úılesímdí úndestígí, sondaı-aq stsenografıyalyq sheshímníń tūtastyǵy teatr mamandary tarapynan joǵary baǵalandy. Festıval qonaqtary men halyqaralyq teatr qauymdastyǵynyń ókílderí qazaqstandyq quyrshaq óneríníń joǵary kásíbı deńgeıín atap óttí.
Kórsetílímnen keıín teatr ūjymy 2027 jyly Rumynıyada ótetín «The International Theatre Festival «Elvira Godeanu» halyqaralyq teatr festıvalíne qatysuǵa shaqyrtu aldy.