Belgílí jurnalıst Abaı Seıfulla píkírles komandasymen bírge jańa bírpalataly Qūryltaı deputattarynyń aldaǵy saılauyna arnalǵan bíryńǵaı aqparattyq resursty íske qosty, – dep habarlaıdy aqshamnews.kz tílshísí.
Qazaqstanda Qūryltaı saılauy turaly aqparattyq resurs íske qosyldy. Būl turaly belgílí jurnalıst Abaı Seıfulla áleumettík jelídegí paraqshasynda habarlady (https://www.facebook.com/share/p/1FjN3Ydhs5/?mibextid=wwXIfr):
«Qūryltaı saılauy qarsańynda jurnalıst árí aqparat salasynyń ókílí retínde men de ortaq íske óz úlesímdí qosyp, azamattarǵa qajettí aqparatty barynsha túsíníktí árí qoljetímdí túrde ūsynǵym keldí. Bír top píkírles azamatpen bírge saılauǵa qatysty barlyq mańyzdy aqparat jınaqtalǵan «Qūryltaı LIVE» platformasyn íske qostyq. Osy joba arqyly Qūryltaı saılauyn elímízdíń árbír azamatyna jaqyn árí túsíníktí etkímíz keledí».
«Qūryltaı LIVE» platformasynyń basty erekshelígí – onda Qūryltaı saılauyna qatysty barlyq aqparat jınaqtalǵan. Sońǵy jańalyqtar, sarapshylardyń píkírlerí men teledebat materıaldarynan bastap, dauys beru tártíbí men saılau uchaskesín ízdeuge deıíngí málímetterdí osy jerden tabuǵa bolady.
Abaı Seıfulla – saılau nauqanyn jarıyalap, Qūryltaı deputattyǵyna kandıdattar men táuelsíz sarapshylardyń qatysuymen podkasttar ótkízetín Abay Live YouTube-arnasynyń avtory. Sondaı-aq ol eldegí ózektí qoǵamdyq-sayası oqıǵalarǵa arnalǵan avtorlyq baǵdarlamalar ázírlep, sayasatkerlermen jáne qoǵam qaıratkerlerímen sūhbat júrgízedí. Abaı Seıfulla túrlí alańdarda sarapshy retínde sóz sóılep, kún tártíbíndegí máselelerdí taldaıdy jáne bolyp jatqan oqıǵalarǵa saraptamalyq baǵa beredí. Jeke saıttyń ashyluy osy jūmystyń jalǵasy boldy.
Platformada saılau nauqanynyń barysy turaly jańalyqtar, saraptamalyq píkírler, áleumettík zertteulerdíń nátıjelerí, sūhbattar, podkasttar jáne basqa aqparattyq alańdarda jarıyalanǵan materıaldar ornalastyrylady. Qoldanushylar debattarda qandaı máseleler talqylanatynyn, sayası partıyalar men kandıdattardyń ne ūsynatynyn bíle alady, sondaı-aq qoǵamdyq píkírdí zertteu nátıjelerímen tanysa alady. Saıttaǵy aqparat kún saıyn jańartylyp otyrady.
«Saılau turaly» jeke bólímínde saılau protsesí jóníndegí negízgí málímetter jınaqtalǵan. Onda sayası partıyalardy tírkeu, kandıdattardyń sany men qūramy, saılau nauqanynyń kezeńderí jáne saılaudy baqylau turaly aqparat bar.
Saıtta jıí qoıylatyn sūraqtarǵa jauaptar da ūsynylǵan. Azamattar dauys beru úshín qandaı qūjattar qajet ekenín, shetelde qalaı dauys beruge bolatynyn, qosymsha aqparat alu úshín qaıda júgínu kerektígín jáne óz saılau uchaskesín qalaı tabuǵa bolatynyn bíle alady.
Osylaısha, «Qūryltaı LIVE» Qūryltaıǵa aldaǵy saılau turaly jańalyqtardy, saraptamalyq jáne praktıkalyq aqparatty bír alańǵa bíríktíredí.
Abaı Seıfulla qazaqstandyqtardy jańa resurspen tanysyp, komandanyń jūmysyna baǵa beruge jáne óz ūsynystarymen bólísuge shaqyrdy.
Jobanyń saıty: https://qurultai.live/ru