Qalamyzda «Taza Qazaqstan» aktsıyasy álí de jalǵasyp jatyr. Būl arqyly Almaty ekologıyalyq jauapkershílígí joǵary qala ekenín kórsetíp keledí. Kezektí ís-shara barysynda shahardaǵy tūrmystyq qaldyqtarǵa arnalǵan konteınerler men alańqaılar arnaıy tazalaudan ótkízíldí. Būl – tek sanıtarlyq shara ǵana emes, ekologıyalyq mádenıettí qalyptastyrudaǵy mańyzdy qadam.
Suret: Qaırat Qonysbaev
24 sáuír kúní Qalamyzdyń Áuezov audanyndaǵy úsh mekenjaıda ornalasqan konteınerler men qoqys alańqaılaryna tazalyq jūmystary júrgízíldí. Aıtalyq, 3-yqshamaudan, №14-úı, №65-úı jáne 1-yqshamaudandaǵy № 77 úılerdíń aulalaryna ornalasqan kúndelíktí tūrmystyq qaldyqtarǵa arnalǵan konteınerlerge dezınfektsıya jasaldy. Shara barysynda tek konteınerler ǵana emes, olar ornalasqan alańqaılar da óńdelíp, deratızatsıya jūmystary júrgízíldí. Būl endí bír jaǵynan auru taratushy kemírgíshtermen kúrestíń de tıímdí ádísí retínde qolǵa alynǵan.
Konteınerler jaqyn ornalasqan úılerdíń tūrǵyndary da tazalyq sharasyn qoldaıtynyn jetkízdí.
– Qaldyqtar jınalatyn oryn tazartylyp, arnaıy sūıyqtyqtarmen óńdelíp jatyr. Auasy men aınalasy tazaryp, óńílímíz de ornyǵyp jatqandaı. Balalarymyz emín-erkín oınaı alatyn boldy. Osyndaı ıgí jūmystar kóbeıse eken deımín. Qalanyń tazalyǵy – árbír tūrǵynnyń jauapkershílígí, sondyqtan barshamyz ıgí íske atsalysuymyz kerek, – deıdí 3-yqshamaudan tūrǵyny Gúlnar Myrzahanqyzy.
Mahanbet Sansyzbaev, Almaty qalasynyń Ekologıya jáne qorshaǵan ortany qorǵau basqarmasynyń qaldyqtardy basqaru bólímíníń bas mamany:
-Júrgízílíp jatqan shara tek syrtqy tazalyq emes, tūrǵyndardyń densaulyǵyn qorǵau. Konteınerler men alańqaılardy dezınfektsıyalau – túrlí aurulardyń aldyn aludyń bírden-bír joly. Būl jūmys aldaǵy uaqytta da júıelí túrde júrgízílíp otyrady.
