Qazdan qashqan úsh jasar Kereı Mahambetuly az ýaqyt ishinde álem juldyzyna aınaldy. Onyń vıdeosy tipti amerıkalyq reper Snoop Dogg repost jasap, jelini shýlatty. Aqshamnews.kz tilshisi juldyzdyń ákesimen suhbattasty.
Kereı qalaı juldyzǵa aınaldy?
Kereıdiń ákesi Mahambettiń aıtýynsha, bári bir sátte bolǵan oqıǵa.
"Qulynǵa jem berip kele jatqanbyz. Balam artta qalyp qoıdy. Qazdar onyń qolyndaǵy shelekti tamaq dep oılap, sońynan júgirgen. Al ol qorqyp qasha bardy. Sol sátti vıdeoǵa túsirip, 9 tamyzda jelige salǵan edim. Bir aptada-aq 100 mıllıon qaralymǵa jetti. Qazir Instagram-da 150 mıllıonǵa, al TikTok-ta 50 mıllıonǵa jýyqtady", – deıdi ákesi.
Jeli qoldanýshylary kishkentaı Kereıdi "qaz qýǵan bala" dep atap ketken. Sheteldikter de, ózge qazaqtar da balaǵa tánti bolyp, pikir qaldyryp jatyr. Vıdeo 12 mıllıon laık pen 55 myń pikir jınap úlgergen.
Kereı kim?
Úsh jastaǵy Kereı Aqtóbedegi Kúnshýaq shaǵynaýdanynda turady. Balabaqshaǵa baryp júr. Ákesi - mekteptegi dene shynyqtyrý pániniń muǵalimi, al úıinde jylqy, qaz, ponı baǵylady. Balapan kezinen jan-janýardyń ortasynda ósken Kereı negizi qazdan qoryqpaıdy eken. Biraq sol kúni artynan qýalaǵan qazdyń arqasynda juldyzǵa aınaldy.
Kereıdiń eki baýyry bar. Ákesi balalarynyń beınejazbasyn jıi túsirip, áleýmettik jelige salyp júredi.
"Endi áleýmettik jelini kásibı túrde damytqym keledi", – deıdi ol.
Ákesiniń aıtýynsha, álemdik reper repost jasaǵan soń, oǵan jazyp, vıdeonyń túpnusqasyn suraıtyndar kóbeıgen.
"Onyń 88 mıllıon oqyrmany bar. Álemniń túkpir-túkpirinen vıdeonyń túpnusqasyn aqshaǵa satyp alýdy surap jazyp jatyr. Qujattar da jiberip jatyr, biraq ony túgel aýdaryp, túsiný kerek", – dedi ol.
Alǵashqy usynystar
Vıdeodan keıin Kereıge alǵashqy usynystar da túsipti.
"Qolyndaǵy shelekti kórdińiz be? Sol kompanıa 75 lıtr ónim berdi. Basqa usynystar ázirge túsken joq", – deıdi ákesi kúlip.
Qazaqtyń kishkentaı atqumary
Kereı atqa minýdi erekshe jaqsy kóredi.
"Kishkentaıynan jylqyǵa áýes. Janýarmen birge ósken soń, tabıǵatqa jaqyn", – deıdi ákesi.
Kishkentaı ǵana bir sát mıllıondaǵan adamnyń kóńilin kóterdi. Aqtóbeniń shaǵynaýdanynan bastalǵan oqıǵa búginde búkil álemge tarady.
"Týǵan-týys, dostar, tipti dúkendegiler de tanyp jatyr. Bazarǵa barǵanda "bul qazdan qashqan bala emes pe?" dep jatyr", - deıdi Mahambet myrza.