Mádenıet jáne sport vıse-mınıstri Nurǵısa Dáýeshov elimizdiń Qysqy Olımpıada oıyndaryna qalaı daıyndalyp jatqany týraly aıtyp berdi, dep habarlaıdy almaty-akshamy.kz baq.kz silteme jasap.
Eske sala keteıik, 23 qyrkúıekte senator Nurjan Nursıpatov Mádenıet jáne sport mınıstri Aqtoty Raıymqulovaǵa Beıjińde ótetin XXIV qysqy Olımpıada oıyndaryna daıyndyq barysy jaıynda saýal joldaǵan bolatyn.
2018 jyldan bastap jyl saıyn olımpıadalyq sport túrleri boıynsha ulttyq qurama komandalardy daıyndaý boıynsha memlekettik tapsyrys sheńberinde mınıstrlik pen Ulttyq Olımpıada komıteti arasynda shart jasalýda. 2021 jylǵy 8 qańtardaǵy memlekettik tapsyrystyń aıasynda Ulttyq Olımpıada komıteti qysqy sport túrleri boıynsha ulttyq qurama komandalardyń Olımpıada oıyndaryna daıyndyǵyn qamtamasyz etedi, - dedi Dáýeshov.
Aıtýynsha, sport rezervin daıarlaýdyń ózekti máselelerin talqylaý jáne birlesip sheshim qabyldaý maqsatynda mınıstrdiń tóraǵalyǵymen 2021 jylǵy 17-24 tamyz aralyǵynda óńirlik dene shynyqtyrý jáne sport basqarmalarynyń basshylary men vedimistik baǵynysty uıymdardyń, Ulttyq Olımpıada komıteti ókilderiniń qatysýymen qysqy sport túrleri boıynsha bas jattyqtyrýshylar men federasıalardy tyńdaý ótkizildi.
Tyńdaý qorytyndysy boıynsha, Pekın qalasynda 2022 jylǵy XXIV qysqy Olımpıada oıyndaryna daıyndyq barysy týraly Jol kartasy ázirlenip, bekitildi. Jol kartasynda oblystyq jáne respýblıkalyq mańyzy bar qalalardyń dene shynyqtyrý jáne sport basqarmalaryna, vedimistik baǵynysty uıymdarǵa, Ulttyq Olımpıada komıtetine jáne qysqy sport túrleri boıynsha federasıalarǵa naqty tapsyrmalar berilgen.
2021 jylǵy 2 qyrkúıekte Premer-Mınıstrdiń orynbasary Eraly Toǵjanovtyń tóraǵalyǵymen buqaralyq sportty damytý jáne Pekın qalasynda 2022 jylǵy XXIV Qysqy Olımpıada oıyndaryna daıyndyq máseleleri boıynsha múddeli memlekettik organdardyń, barlyq óńirler ákimderi orynbasarlarynyń, bas jattyqtyrýshylardyń, qysqy sport túrleri boıynsha federasıalardyń, Ulttyq Olımpıada komıtetiniń qatysýymen keńeıtilgen keńes ótti. Onda, tıisinshe, qysqy sport túrlerin damytýdyń problemalyq máseleleri boıynsha hattamalyq tapsyrmalar berildi, - dedi vıse-mınıstr depýtattarǵa bergen jaýabynda.
Sondaı-aq qysqy sport túrleri boıynsha eldiń shtattyq qurama komandalary bas jattyqtyrýshylardyń jeke basshylyǵymen bekitilgen jeke daıyndyq josparlaryna sáıkes, Qysqy Olımpıada oıyndaryna belsendi daıyndalyp jatyr.
2020 jyldan bastap 2022 jylǵy Qysqy Olımpıada oıyndaryna lısenzıalardy jeńip alý boıynsha túrli álemdik lısenzıalyq, reıtıńtik týrnırler ótkiziledi. Qazaqstandyq sportshylar, sondaı-aq basqa elderdiń sportshylary da osy týrnırlerge qatysa otyryp, Olımpıada oıyndaryna qatysý úshin reıtıńtik upaı jınaıdy. Sońǵy lısenzıalyq týrnır 2022 jyldyń qańtar aıynda ótedi. 2022 jylǵy qańtar aıynyń sońynda reıtıńtik týrnırlerdiń qorytyndylary shyǵarylyp, lısenzıalardyń sany aıqyndalady. Aıta ketý kerek, Olımpıada oıyndarynyń aldynda bizdiń sportshylar 50-ge jýyq lısenzıalyq týrnırge qatysýdy josparlap otyr. Qazaqstandyq sportshylar shańǵy jarysy, bıatlon, kónkımen júgirý sporty, short-trek, frıstaıl-mogýl, frıstaılakrobatıka jáne tuǵyrdan shańǵymen sekirý boıynsha irikteý jarystaryna qatysady, - delingen mınıstrlik jaýabynda.
Búgingi tańda mınıstrlik «Qazaqstan Respýblıkasynyń keıbir zańnamalyq aktilerine dene shynyqtyrý jáne sport máseleleri boıynsha ózgerister men tolyqtyrýlar engizý týraly» zańnyń jobasyn ázirlep jatyr. Onda dene shynyqtyrý jáne sport salasyndaǵy ýákiletti organnyń buqaralyq sportty damytý jáne sport túrleri boıynsha ulttyq qurama komandalarǵa arnalǵan sport rezervin daıyndaý boıynsha jergilikti atqarýshy organdardyń jumysyn baqylaý bóliginde baqylaý-qadaǵalaý fýnksıalaryn júzege asyrý boıynsha quzyretin kúsheıtý kózdeledi.