13-17 qazan aralyǵynda ótken Ózbekstan Respýblıkasyndaǵy Qazaqstandyq medısına kúnderi aıasynda Qazaq onkologıa jáne radıologıa ǵylymı-zertteý ınstıtýtynyń (QazOjRǴZI) mamandary tájirıbe almasýǵa, halyqaralyq yntymaqtastyqty damytýǵa jáne onkologıalyq kómek salasyna zamanaýı tehnologıalardy engizýge baǵyttalǵan birqatar oqytý jáne tájirıbelik is-sharalar ótkizdi.
Býharadaǵy jumys
13-15 qazan aralyǵynda Respýblıkalyq mamandandyrylǵan onkologıa jáne radıologıa ǵylymı-tájirıbelik medısınalyq ortalyǵynyń bazasynda onkolog-dárigerlerge arnalǵan sheberlik synyptary, hırýrgıalyq kórsetilimder, dárister men semınarlar, sondaı-aq pasıentterge arnalǵan keńester ótti.
QazOjRǴZI Onkýrologıa ortalyǵynyń basshysy, PhD doktory Hýsan Ómirzaqov búırek rezeksıasy jáne keńeıtilgen nefrektomıa boıynsha laparoskopıalyq operasıalardy kórsetip, pasıentterdi qalpyna keltirý merzimin qysqartýǵa jáne emdeýdiń fýnksıonaldyq nátıjelerin jaqsartýǵa múmkindik beretin eń az ınvazıvti tehnologıalardyń artyqshylyqtaryn atap ótti.
Onkogınekologıa ortalyǵynyń basshysy, profesor Erlan Kýkýbasov áıel reprodýktıvti júıesiniń qaterli isikterin aǵzany saqtaıtyn jáne joǵary tehnologıalyq emdeýdiń zamanaýı tásilderin tanystyra otyryp, birneshe laparoskopıalyq radıkaldy gısterektomıa ótkizdi.
Hırýrgıalyq kórsetilimdermen qatar, QazOjRǴZI mamandary óńirdiń 35 dárigerine arnalǵan dárister men semınarlar uıymdastyrdy. Sondaı-aq, onkogınekologıalyq jáne ýrologıalyq patologıalary bar 20 pasıentke emdeý jáne odan ári baqylaý boıynsha jeke usynymdar berý arqyly keńes berildi.
Tashkenttegi ǵylymı kezdesýler
16 qazannan bastap delegasıanyń jumysy Tashkentte jalǵasty, onda Respýblıkalyq onkologıa jáne radıologıa ortalyǵynyń basshylyǵymen jáne ujymymen kezdesýler ótti. Sapar aıasynda ǵylymı-bilim berý sesıasy ótip, onda QazOjRǴZI mamandary qazirgi zamanǵy onkologıanyń negizgi baǵyttary boıynsha baıandamalaryn usyndy:
• «3D-tehnologıalardy qoldanýmen onkoortopedıa» - m.ǵ.k. Ǵanı Serikbaev, Súıek isikteri jáne jumsaq tinder ortalyǵynyń basshysy;
• «Sáýlelik terapıanyń zamanaýı ádisteri» - m.ǵ.d. Vıktor Kım, Radıasıalyq onkologıa ortalyǵynyń basshysy;
• «Onkogınekologıa jáne onkoýrologıadaǵy robottandyrylǵan hırýrgıa» - profesor Erlan Kýkýbasov pen PhD Hýsan Ómirzaqov.
Sandyq sheshimderdi ıntegrasıalaý, telemedısınany damytý, NCCN jáne ESMO halyqaralyq usynymdary negizinde emdeý hattamalaryn engizý, sondaı-aq Qazaqstan men Ózbekstannyń klınıkalyq mektepteri arasynda tájirıbe almasý máseleleri talqylandy.
«Qazaqstan-Ózbekstan: densaýlyq saqtaý salasyndaǵy seriktestik» forýmy
Sapardyń sońǵy kezeńi 17 qazanda Tashkentte ótken «Qazaqstan-Ózbekstan: densaýlyq saqtaý, tehnologıa jáne kadrlar salasyndaǵy seriktestik» Forýmyna QazOjRǴZI delegasıasynyń qatysýy boldy.
İs-shara Qazaqstan Respýblıkasy men Ózbekstan Respýblıkasy Densaýlyq saqtaý mınıstrlikteriniń, eki eldiń ǵylymı ınstıtýttary men jetekshi medısınalyq ortalyqtarynyń ókilderin biriktirip, tájirıbe almasý jáne ekijaqty ózara is-qımyldy nyǵaıtý úshin mańyzdy alańǵa aınaldy.
Forým baǵdarlamasy aıasynda QazOjRǴZI Basqarma Tóraǵasy Erbol Bekmuhambetov «Qazaqstan Respýblıkasynda onkologıalyq kómekti damytý» taqyrybynda baıandama jasady. Óz sózinde ol reformalardyń strategıalyq baǵyttaryn, erte dıagnostıka, dári-dármekpen qamtamasyz etý jáne ınovasıalyq tehnologıalardy, sonyń ishinde robottandyrylǵan hırýrgıa men ıadrolyq medısınany engizý salasyndaǵy jetistikterdi tanystyrdy.
Birlesken basymdyqtar týraly dıalogty jalǵastyra otyryp, eki eldiń Densaýlyq saqtaý mınıstrlikteri basshylyǵynyń qatysýymen taraptar hırýrgıalyq onkologıa, radıoterapıa, patomorfologıa jáne ǵylymı zertteýler sıaqty baǵyttardaǵy seriktestikti keńeıtý bolashaǵyn talqylady.
Forým qorytyndysy boıynsha QazOjRǴZI men Ózbekstannyń Respýblıkalyq mamandandyrylǵan onkologıa jáne radıologıa ǵylymı-tájirıbelik medısınalyq ortalyǵy arasynda yntymaqtastyq týraly Memorandýmǵa qol qoıyldy. Qujat birlesken ǵylymı jobalardy damytýdy, taǵylymdamalar men oqytý baǵdarlamalaryn ótkizýdi, sondaı-aq eki eldiń mamandary arasynda tájirıbe almasýdy kózdeıdi.
Yntymaqtastyqty keńeıtý
Qazaqstandyq onkologtardyń Ózbekstandaǵy Qazaqstandyq medısına kúnderine qatysýy densaýlyq saqtaý salasyndaǵy memleketaralyq qatynastardy nyǵaıtýdaǵy mańyzdy qadam boldy. Eki eldiń dárigerleri onkologıalyq qyzmetti damytýǵa, mamandardyń biliktiligin arttyrýǵa jáne qaterli isikti dıagnostıkalaý men emdeýdiń ozyq tehnologıalaryn engizýge baǵyttalǵan júıeli yntymaqtastyqty jalǵastyrýǵa daıyn ekendikterin bildirdi.
