2021 jylǵy 1 maýsymdaǵy málimet boıynsha, múgedektigine baılanysty memlekettik áleýmettik járdemaqy alýshylardyń sany 528 myń adam, asyraýshysynan aıyrylý jaǵdaıy boıynsha 171 myń adamǵa jetken.
2021 jylǵy qańtar-mamyr aılary aralyǵynda respýblıkalyq búdjetten múgedektigine baılanysty memlekettik áleýmettik járdemaqy tóleýge 128,8 mlrd teńge, asyraýshysynan aıyrylý jaǵdaıyna 34,4 mlrd teńge bólingen, dep habarlaıdy Almaty-akshamy.kz QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
Múgedektigi boıynsha memlekettik áleýmettik járdemaqylardyń mólsheri múgedektiktiń tobyna jáne sebebine, sondaı-aq tıisti qarjy jylyna arnalǵan «Respýblıkalyq búdjet týraly» zańda belgilenetin eń tómen kúnkóris deńgeıiniń shamasyna baılanysty bolady.
Asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qaıtys bolǵan (qaza tapqan) asyraýshysynyń asyraýyndaǵy adamdardyń sanyna, sondaı-aq tıisti qarjy jylyna arnalǵan «Respýblıkalyq búdjet týraly» zańda belgilenetin eń tómen kúnkóris deńgeıiniń shamasyna baılanysty bolady.
2021 jylǵy 1 maýsymdaǵy jaǵdaı boıynsha, múgedektigi boıynsha memlekettik áleýmettik járdemaqynyń ortasha mólsheri 49 338 teńge bolsa, asyraýshydan aıyrylý jaǵdaıy boıynsha memlekettik áleýmettik járdemaqynyń ortasha mólsheri 40 865 teńge kóleminde.