Íshkí íster mınıstrlígíníń málímdeuínshe, engízílgen ózgerísterdíń barlyǵy jol qauípsízdígín kúsheıtuge jáne jol qozǵalysyna qatysushylar úshín qolaıly jaǵdaı jasauǵa baǵyttalǵan, – dep habarlaıdy aqshamnews.kz tílshísí.
Qazaqstanda júrgízushílerdí dayarlaıtyn oqu ūıymdaryna baqylau kúsheıtílíp, elektrosamokattardyń trotuarlar men jayau júrgínshíler joldarymen júruíne tyıym salynady.
Íshkí íster mınıstrlígí Memleket basshysy Qasym-Jomart Toqaev 2026 jylǵy 24 mausymda qol qoıǵan "Qazaqstan Respublıkasynyń keıbír zańnamalyq aktíleríne tsıfrlandyru, derbes derekterdí qorǵau, jol qozǵalysy jáne kólíktegí ozyq tehnologıyalardy retteu máselelerí boıynsha ózgeríster men tolyqtyrular engízu turaly" zańǵa túsíníkteme berdí.
Vedomstvonyń málímetínshe, jol qozǵalysy salasyndaǵy ózgeríster jol qauípsízdígín arttyruǵa, júrgízushílerdí sapaly dayarlau júıesín qalyptastyruǵa jáne osy saladaǵy memlekettík baqylaudy kúsheıtuge baǵyttalǵan.
Osyǵan baılanysty jol qozǵalysy qauípsízdígín qamtamasyz etu jóníndegí uákílettí organ – Íshkí íster mınıstrlígíne júrgízushílerdí dayarlaıtyn oqu ūıymdaryna qyzmet júrgízuge rūqsat beru jáne olardyń jūmysyn baqylau qūzyretí beríledí.
Zańdaǵy mańyzdy jańalyqtardyń bírí – elektrosamokattardyń trotuarlar men jayau júrgínshíler joldarymen júruíne tyıym salu. Mınıstrlík mūndaı kólík qūraldarynyń, ásírese balalar úshín, jayau júrgínshíler qauípsízdígíne naqty qauíp tóndíretínín atap óttí.
Vedomstvo deregínshe, 2025 jyly elímízde elektrosamokat júrgízushíleríníń kínásínen 139 jol-kólík oqıǵasy tírkelíp, saldarynan 149 adam jaraqat alǵan.
Sonymen qatar túzetulerge sáıkes, "Jol júrísí turaly" zańnan eldí mekenderde qozǵaltqyshy jūmys ístep tūrǵan kólíktí tūraqta qaldyruǵa qatysty tyıym alynyp tastalady. Būdan bólek, jol qozǵalysyn avtomatty túrde tírkeıtín kameralardy qoldanu ayasy keńeıtílíp, elektromobılder úshín arnaıy memlekettík tírkeu nómírlerí engízíledí.