Mámíle barlyq standartty talaptar oryndalǵan jaǵdaıda 2026 jyldyń shílde aıynda jabylady dep kútílude, – dep habarlaıdy aqshamnews.kz tílshísí.
Kaspi.kz búgín Túrkıyanyń Banktík retteu jáne qadaǵalau agenttígínen (BDDK) túrkıyalyq Rabobank A.Ş. -tí satyp aluǵa rūqsat alǵanyn habarlady.
Kaspi.kz basshysy árí negízín qalaushylardyń bírí Mıhaıl Lomtadze:
«Bíz Túrkıyadaǵy Rabobank A.Ş.-ty satyp aluǵa BDDK maqūldauyn alǵanymyzǵa quanyshtymyz. Būl Kaspi.kz úshín mańyzdy kezeń jáne túrík naryǵynda bıznesímízdí damytudaǵy úlken jetístík. Jūmys barysynda ózara tıímdí áreket etkení úshín BDDK men tıístí organdarǵa alǵys aıtamyz.
Kaspi.kz – qazaqstandyq jetekshí tehnologıyalyq kompanıya, Túrkıyada bıznesímízdí damytu bíz úshín úlken mártebe. Mámíle ayaqtalǵannan keıín bíz Túrkıyadaǵy tūtynushylar men kásípkerler úshín tsıfrlyq múmkíndíkterdí keńeıte otyryp, tólemder, elektrondyq kommertsıya jáne qarjyteh salasyndaǵy tájírıbemízdí qoldanudy josparlap otyrmyz. Būl baǵyttaǵy jūmysymyz endí ǵana bastalyp keledí jáne Kaspi.kz-tíń aldaǵy múmkíndíkteríne zor yqylaspen qaraımyz».
Būǵan deıín Kaspi.kz Rabobank tobymen Rabobank-tyń túrkıyalyq enshíles kompanıyasy – Rabobank A.Ş.-ty satyp alu turaly aktsıyalardy satyp alu-satu shartyna qol qoıǵan bolatyn.
Rabobank A.Ş. – Túrkıyadaǵy lıtsenzıyasy bar bank, onyń qaryz alushy klıentterí de, salymshylary da, sondaı-aq fılıaldyq jelísí de joq.
Kaspi.kz turaly
Kaspi.kz mıssıyasy – súıíktí klıentterí men seríktesteríníń ómírín jaqsartatyn ınnovatsıyalyq ónímder men servısterdí jasau.
Kaspi.kz servısterín Qazaqstan men Túrkıyada 25 mıllıonnan astam klıent jáne 900 myń seríktes paıdalanady.
Qazaqstanda Kaspi.kz superqosymshasy tólemderdí, elektrondyq kommertsıyany, onlaın-supermarkettí, fınteh qyzmetterín, sayahat servısterín, habarlandyrulardy, memlekettík qyzmetterdí jáne kúndelíktí ómírge qajettí basqa da qyzmetterdí bíríktíredí.
Túrkıyada Kaspi.kz eldegí jetekshí elektrondyq kommertsıya platformalarynyń bírí bolyp sanalatyn Hepsiburada kompanıyasyna ıelík etedí.